ಯಾರನ್ನೂ ಸ್ನೇಹಿತರನ್ನಾಗಿಸಿಕೊಳ್ಳಲು ಭಯವಾಗತ್ತೆ: ಉದ್ದವ್ ಠಾಕ್ರೆ

2014ರಲ್ಲಿ ನಡೆದ ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆ ಸಂದರ್ಭದಲ್ಲಿ ಬಿಜೆಪಿ ಜತೆಗಿನ 25 ವರ್ಷಗಳ ದೀರ್ಘ ಸ್ನೇಹವನ್ನು ಮುರಿದುಕೊಂಡಿದ್ದ ಶಿವಸೇನೆ ಅಷ್ಟೇ ಬೇಗ ಮತ್ತೆ ಒಂದಾಗಿದ್ದು ಎಲ್ಲರಿಗೂ ಗೊತ್ತಿರುವ ವಿಚಾರ. ಬಿರುಕು ಬಿಟ್ಟಿದ್ದ ಮಿತ್ರತ್ವವೆನೋ ಒಗ್ಗೂಡಿತು. ಆದರೆ ಬಿಜೆಪಿ ವಿರುದ್ಧ ಆಗಾಗ ಶಿವಸೇನೆ ಗುಡುಗುತ್ತಿರುವುದನ್ನು ಗಮನಿಸಿದರೆ ಅದರ ಗಾಯ ಇನ್ನು ಮಾಗಿಲ್ಲವೆಂಬುದಂತೂ ಸತ್ಯವೆನಿಸುತ್ತದೆ. 

ಇದಕ್ಕೆ ಪೂರಕವೆಂಬಂತಿದೆ ಶಿವಸೇನಾ ನಾಯಕ ಉದ್ಧವ್ ಠಾಕ್ರೆ ರಾಷ್ಟ್ರೀಯ ಪತ್ರಿಕೆಯೊಂದರ ಜತೆ ಆಡಿದ್ದ ಮಾತುಗಳು. ತಮ್ಮ ಪಕ್ಷ ಸ್ನೇಹಿತರಿಂದ ಮತ್ತು ವೈರಿಗಳಿಂದ ಪಾಠ ಕಲಿತಿದೆ. ಈಗ ಯಾರನ್ನೂ ಸ್ನೇಹಿತರೆಂದು ಕರೆಯಬೇಕಾದರೆ ನಮಗೆ ಭಯವಾಗುವಂತೆ ಮಾಡಿದೆ ಎಂದು ಅವರು ಹೇಳಿದ್ದಾರೆ. 

ಇದು ಶುಭಶಕುನವೆನ್ನಿ ಅಥವಾ ಅಶುಭವೆನ್ನಿ. ಯಾರು ನಮ್ಮವರು, ಯಾರು ಪರರು, ಯಾರು ಸ್ನೇಹಿತರು ಮತ್ಯಾರು ಶತ್ರುಗಳು? ಎಂಬ ಸಂಪೂರ್ಣ ಚಿತ್ರಣ ಈಗ ಸ್ಪಷ್ಟವಾಗಿದೆ. ಯಾರನ್ನಾದರೂ ಗೆಳೆಯರೆನ್ನಬೇಕಾದರೆ ಆತಂಕವಾಗುತ್ತದೆ. ನಿಜವಾದ ಸ್ನೇಹಿತರೆನ್ನಲು ಯಾರಾದರು ಉಳಿದುಕೊಂಡಿದ್ದಾರೆಯೇ? ಎಂದು ಠಾಕ್ರೆ ಪ್ರಶ್ನಿಸಿದ್ದಾರೆ. 

ಈ ಸಂದರ್ಭದಲ್ಲಿ ಅವರು ಯಾವುದೇ ಪಕ್ಷದ ಹೆಸರನ್ನು ಉಲ್ಲೇಖಿಸಲಿಲ್ಲವಾದರೂ ಇದು ಬಿಜೆಪಿಯನ್ನುದ್ದೇಶಿಸಿ ಹೇಳಿದ್ದು ಎಂಬುದಂತೂ ಸ್ಪಷ್ಟವಾಗಿತ್ತು. ಬಿಜೆಪಿ ತಮಗೆ ವಂಚಿಸಿದೆ ಎಂದು ಸೇನಾ ನಾಯಕರೆಲ್ಲರೂ ಒಪ್ಪಿಕೊಳ್ಳುತ್ತಿದ್ದಾರೆ.