ರೈಲ್ವೆ ಕ್ರಾಸಿಂಗ್‌ನಲ್ಲಿ ವ್ಯಾನ್- ರೈಲು ಭೀಕರ ಅಪಘಾತ: 12 ಸಾವು

ವ್ಯಾನ್​'ವೊಂದು ರೈಲಿಗೆ ಡಿಕ್ಕಿ ಹೊಡೆದ ಪರಿಣಾಮ ವ್ಯಾನ್​'ನಲ್ಲಿದ್ದ 12 ಮಂದಿ ಮೃತಪಟ್ಟಿರುವ ದಾರುಣ ಘಟನೆ ಹರಿಯಾಣದಲ್ಲಿ ಸಂಭವಿಸಿದೆ. 

ಸರಸೋದ್ ಗ್ರಾಮದ ಬಳಿ ಮಾನವರಹಿತ ರೈಲ್ವೆ ಕ್ರಾಸಿಂಗ್'ನಲ್ಲಿ ನಡೆದ ಈ ದುರಂತದಲ್ಲಿ ಇತರ ಮೂವರು ಗಾಯಗೊಂಡಿದ್ದಾರೆ.

ಸಿಗ್ನಲ್ ರಹಿತ ರೈಲ್ವೆ ಹಳಿ ದಾಟುತ್ತಿದ್ದಾಗ ವ್ಯಾನ್'​ಗೆ ರೈಲು ಡಿಕ್ಕಿ ಹೊಡೆದಿದೆ. ಮುಂಜಾವಿನಲ್ಲಿ ಮಂಜು ದಟ್ಟವಾಗಿದ್ದರಿಂದ ರೈಲು ಬರುವುದು ಕಂಡಿಲ್ಲ. ಹೀಗಾಗಿ ಅಪಘಾತ ಘಟಿಸಿದೆ.

ಅಪಘಾತಕ್ಕೀಡಾದ ಟಾಟಾ ಮ್ಯಾಜಿಕ್ ವಾಹನದಲ್ಲಿ ಒಂದೇ ಕುಟುಂಬದ 15 ಮಂದಿ ಪ್ರಯಾಣ ಬೆಳೆಸುತ್ತಿದ್ದರೆನ್ನಲಾಗಿದೆ.

ಬಲಕ್ ಎಂಬ ಗ್ರಾಮದವರಾದ ಇವರು ಯಾವುದೋ ಧಾರ್ಮಿಕ ಕಾರ್ಯಕ್ರಮಕ್ಕಾಗಿ ಹೊರಟಿದ್ದರು. ಗಾಯಗೊಂಡಿರುವ ಮೂವರನ್ನ ಹಿಸಾರ್ ಬಳಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.