ಪಾರ್ಥ ಅಖಿಲೇಶ್‌ಗೆ ಸಾರಥಿಯಾದ ರಾಹುಲ್

ಉತ್ತರಪ್ರದೇಶ ವಿಧಾನಸಭಾ ಚುನಾವಣೆ ರಂಗೇರುತ್ತಿದೆ. ಆಡಳಿತಾರೂಢ ಸಮಾಜವಾದಿ ಪಕ್ಷ ಕಾಂಗ್ರೆಸ್‍ನೊಂದಿಗೆ ಮೈತ್ರಿ ಮಾಡಿಕೊಳ್ಳುತ್ತಿರುವ ಬಗ್ಗೆ ಸುದ್ದಿ ಹರಿದಾಡುತ್ತಿರುವ ಬೆನ್ನಲ್ಲೇ ವಾರಣಾಸಿಯ ಹಲವೆಡೆ ರಾಹುಲ್ ಗಾಂಧಿ ಹಾಗೂ ಮುಖ್ಯಮಂತ್ರಿ ಅಖಿಲೇಶ್ ಯಾದವ್ ಕೃಷ್ಣಾರ್ಜುನರಾಗಿ ರಥಾರೂಢರಾಗಿರುವ ಭಿತ್ತಿಪತ್ರಗಳು ರಾರಾಜಿಸುತ್ತಿವೆ.

ಈ ಭಿತ್ತಿಪತ್ರಗಳಲ್ಲಿ ಕಾಂಗ್ರೆಸ್ ಉಪಾಧ್ಯಕ್ಷನನ್ನು ಸಾರಥಿ ಕೃಷ್ಣನಂತೆ ಮತ್ತು ಅಖಿಲೇಶ್ ಅವರನ್ನು ಬಿಲ್ಲು ಬಾಣ ಹಿಡಿದಿರುವ ಅರ್ಜುನನಂತೆ ಬಿಂಬಿಸಲಾಗಿದ್ದು, ಸಂಭಾವ್ಯ ಮೈತ್ರಿಗೆ ಬೆಂಬಲದ ಸೂಚಕದಂತಿದೆ. 

ವಿಕಾಸದಿಂದ ವಿಜಯದತ್ತ ಇಬ್ಬರು ಮಹಾರಥಿಗಳು ಮುನ್ನುಗುತ್ತಿದ್ದಾರೆ ಎಂಬ ಘೋಷ ವಾಕ್ಯ ಕೂಡ ಈ ಭಿತ್ತಿಪತ್ರದಲ್ಲಿದ್ದು ಸಮಾಜವಾದಿ ಪಕ್ಷದ ಚಿಹ್ನೆ ಸೈಕಲ್ ಕೂಡ ಇದೆ.

ನಗರದ ಬೆನಿಯಾಬಾಗ್, ಚೇತಗಂಜ್  ಸೇರಿದಂತೆ ಅನೇಕ ಕಡೆಗಳಲ್ಲಿ ಈ ಪೋಸ್ಟರ್ ಕಂಡು ಬಂದಿವೆ.

ದೇಶದಲ್ಲಿಯೇ ಅತಿ ಹೆಚ್ಚು ಜನಸಂಖ್ಯೆ ಇರುವ ರಾಜ್ಯವೆನಿಸಿಕೊಂಡಿರುವ ಉತ್ತರ ಪ್ರದೇಶದ 403 ವಿಧಾನಸಭಾ ಕ್ಷೇತ್ರಗಳಿಗೆ ಫೆಬ್ರವರಿ 11 ರಿಂದ ಮಾರ್ಚ್ 8 ರವರೆಗೆ ಹಲವು ಹಂತಗಳಲ್ಲಿ ಚುನಾವಣೆ ನಡೆಯಲಿದೆ. ಮಾರ್ಚ್ 11 ರಂದು ಫಲಿತಾಂಶ ಹೊರಬರಲಿದೆ. 

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.