ಎಮ್ಮೆ ಈಜಿ ದಡ ಸೇರಿತು, ಕದ್ದವರು ನೀರು ಪಾಲು

ಎಮ್ಮೆಯನ್ನು ಕದಿಯಲು ಹೋದ ಕಳ್ಳರಿಬ್ಬರು ನೀರುಪಾಲಾದ ಘಟನೆ ರಾಜಸ್ಥಾನ ಮತ್ತು ಮಧ್ಯಪ್ರದೇಶ ಗಡಿಯ ಚಂಬಲ್ ನದಿಯ ದಿಹಾಲಿ ಪ್ರದೇಶದಲ್ಲಿ ನಡೆದಿದೆ.  

ಎಮ್ಮೆಯನ್ನು ಕದ್ದ ಕಳ್ಳರಿಬ್ಬರು ಬಳಿಕ ಚಂಬಲ್ ನದಿಯನ್ನು ದಾಟುವಾಗ ನಾಪತ್ತೆಯಾಗಿದ್ದಾರೆ. ಆದರೆ ಎಮ್ಮೆ ಮಾತ್ರ ಈಜಿ ದಡ ಸೇರುವಲ್ಲಿ ಯಶಸ್ವಿಯಾಗಿದೆ. 

ಆದರೆ ಅವರು ಕದ್ದ ಎಮ್ಮೆ ಸೋಮವಾರ ಮಧ್ಯಪ್ರದೇಶದ ಕೊಥಾಲಾ ಗ್ರಾಮದಲ್ಲಿ ಪತ್ತೆಯಾಗಿದೆ. ಅದರ ಕೊಂಬಿಗೆ ಕಳ್ಳರು ಕಟ್ಟಿದ್ದಾರೆ ಎನ್ನಲಾದ ಪ್ಲಾಸ್ಟಿಕ್ ಕವರ್‌ಲ್ಲಿ ಎರಡು ಮೊಬೈಲ್, ಎರಡು ಜೋಡಿ ಬಟ್ಟೆ, ಮತ್ತು ಶೂ ಪತ್ತೆಯಾಗಿದೆ. 

ಎರಡು ದಿನಗಳಾದರೂ ಕಳ್ಳರು ಪತ್ತೆಯಾಗಿಲ್ಲದಿರುವುದು ಅವರು ನೀರಲ್ಲಿ ಮುಳುಗಿ ಸತ್ತಿರಬಹುದು ಎಂಬ ಶಂಕೆಯನ್ನು ಬಲಗೊಳಿಸಿದೆ.

ಎಮ್ಮೆ ಕಳ್ಳತನವಾಗಿದೆ ಎಂದು ಅದರ ಮಾಲೀಕ ಸೆಪ್ಟೆಂಬರ್ 23 ರಂದು ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದ. ಸೋಮವಾರ ಅದನ್ನು ಆತನಿಗೆ ಒಪ್ಪಿಸಲಾಗಿದೆ.

ನಾಪತ್ತೆಯಾಗಿರುವ ಇಬ್ಬರು ಕಳ್ಳರ ಪತ್ತೆಗಾಗಿ ಶೋಧಕಾರ್ಯ ಮುಂದುವರೆದಿದೆ.