ರಾಷ್ಟ್ರ ರಾಜಧಾನಿಯ ದೆಹಲಿಯ ಬ್ರಹ್ಮಪುರಿ ಪ್ರದೇಶದಲ್ಲಿ ಬೆಚ್ಚಿ ಬೀಳಿಸುವಂತ ತ್ರಿವಳಿ ಕೊಲೆ ನಡೆದಿದ್ದು 50 ವರ್ಷದ ಮಹಿಳೆ ಮತ್ತು ಆಕೆಯ ಇಬ್ಬರು ಮಕ್ಕಳು ಅತ್ಯಂತ ಕ್ರೂರ ಅಂತ್ಯವನ್ನು ಕಂಡಿದ್ದಾರೆ.
ಶನಿವಾರ ಸಂಜೆ ಈ ಘಟನೆ ಬೆಳಕಿಗೆ ಬಂದಿದ್ದು, ಮೃತರನ್ನು 50 ವರ್ಷದ ಸಾಯಿರಾ ಮತ್ತು ಆಕೆಯ ಮಕ್ಕಳಾದ 19 ವರ್ಷದ ಮೆಹರುನ್ನೀಯಾ ಮತ್ತು 9 ವರ್ಷದ ಶಬನಮ್ ಎಂದು ಗುರುತಿಸಲಾಗಿದೆ. ಹೊರಗನಿಂದ ಲಾಕ್ ಆಗಿದ್ದ ಮನೆಯ ಒಳಗಿನಿಂದ ಅಸಹನೀಯ ದುರ್ನಾತ ಬರುತ್ತಿರುವ ಬಗ್ಗೆ ನೆರೆಹೊರೆಯವರು ಪೊಲೀಸರಿಗೆ ಮಾಹಿತಿ ನೀಡಿದಾಗ ಘಟನೆ ಬೆಳಕಿಗೆ ಬಂದಿದೆ. ಬಾಗಿಲು ಒಡೆದು ಒಳ ಹೋದ ಪೊಲೀಸರಿಗೆ ಮೂರು ದೇಹಗಳು ಕೊಳೆತ ಸ್ಥಿತಿಯಲ್ಲಿ ಪತ್ತೆಯಾಗಿವೆ.
ಮೂವರ ದೇಹದ ತುಂಬ ಗಾಯದ ಗುರುತುಗಳಿದ್ದು, ಹರಿತ ಆಯುಧದಿಂದ ತಾಯಿ ಸಾಯಿರಾ ಕತ್ತು ಸೀಳಿ ಕೊಲೆಗೈಯ್ಯಲಾಗಿದೆ. ಮೆಹರುನ್ನೀಸಾಳನ್ನು ಬೆಡ್ ರೂಮ್‌ನಲ್ಲಿ ಬೀಭತ್ಸವಾಗಿ ಕೊಲೆಗೈದರೆ, ಪುಟ್ಟ ಹುಡುಗಿ ಶಬನಮ್ ದೇಹ ಬಾತ್ ರೂಮ್‌ನಲ್ಲಿ ಕಂಡು ಬಂದಿದೆ. ಸಾಯಿರಾ ದೇಹವನ್ನು ಟೇರೆಸ್ ಕಡೆ ಎಳೆದೊಯ್ಯಲು ಪ್ರಯತ್ನಿಸಿ ಮೆಟ್ಟಿಲುಗಳ ಮೇಲೆ ಬಿಡಲಾಗಿದೆ.
ಮೂರು ದಿನಗಳ ಹಿಂದೆ ಈ ಘಟನೆ ನಡೆದಿರಬಹುದು ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದು ಬಂದಿದೆ.
ಮನೆ ಅವ್ಯವಸ್ಥಿತವಾಗಿದ್ದು ದರೋಡೆ ಅಥವಾ ಬಲಿಪಶುಗಳ ಮತ್ತು ಕೊಲೆಗಾರರ ನಡುವೆ ಮಾರಾಮಾರಿಯಾಗಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ.
ಸಾಯಿರಾ ಪತಿ ಮುನ್ನಾ ಎರಡು ವರ್ಷಗಳ ಹಿಂದೆ ಸಾವನ್ನಪ್ಪಿದ್ದ. ಆತನಿಗೆ ಎರಡನೆಯ ಪತ್ನಿ ಸಹ ಇದ್ದು ಎರಡು ಕುಟುಂಬಗಳ ಮಧ್ಯೆ ಇದ್ದ ಆಸ್ತಿ ವಿವಾದ ಘಟನೆಗೆ ಕಾರಣವಾಗಿರಬಹುದೆಂದು ಹೇಳಲಾಗುತ್ತದೆ.