ವೇಲೂರು:ವರ ಇನ್ನೇನು ವಧುವಿಗೆ ತಾಳಿಕಟ್ಟಬೇಕು ಅನ್ನುವಷ್ಟರಲ್ಲಿ ಮದುವೆ ಮನೆಗೆ ಬಂದ ವರನ ತಮ್ಮ, ಅಣ್ಣನನ್ನು ಪಕ್ಕಕ್ಕೆ ದೂಡಿ ವಧುವಿಗೆ ತಾಳಿಕಟ್ಟಿದ ಘಟನೆ ತಮಿಳುನಾಡಿನಲ್ಲಿ ನಡೆದಿದೆ.
ವೇಲೂರು ಜಿಲ್ಲೆಯ ತಿರುಪತ್ತೂರಿನ ಕಾಮರಾಜ್‌ ಎಂಬುವವರಿಗೆ ಮೂವರು ಗಂಡು ಮಕ್ಕಳು. ಆರು ತಿಂಗಳ ಹಿಂದೆ ಎರಡನೇ ಮಗ ರಾಜೇಶ್‌ಗೆ ಮಧುರೈನ ಯುವತಿಯೊಂದಿಗೆ ವಿವಾಹ ನಿಶ್ಚಯವಾಗಿತ್ತು. ನಿನ್ನೆ ವೆನಕಲ್‌ನ ಮುರುಗನ್ ದೇಗುಲದಲ್ಲಿ ಮದುವೆಗೆ ವೇದಿಕೆಗೆ ಸಿದ್ಧವಾಗಿತ್ತು. ವಧುವರರನ್ನು ಹಸೆಮಣೆ ಮೇಲೆ ಕೂರಿಸಿ ಪುರೋಹಿತರು ವೇದ ಮಂತ್ರ ಉಚ್ಛರಿಸುತ್ತಿದ್ದರು. ವರ ರಾಜೇಶ್‌ ಕೈಗೆ ಮಂಗಳಸೂತ್ರ ನೀಡಿ ವಧುವಿಗೆ ತಾಳಿ ಕಟ್ಟುವಂತೆ ಸೂಚಿಸುತ್ತಿದ್ದರು.
ಆಗ ಮಧುವೆಯ ಸ್ಥಳಕ್ಕೆ ಬಂದ ಮೂರನೇ ಮಗ ವಿನೋದ್ ಅಣ್ಣ ರಾಜೇಶ್‌ನ ಕೈಯಲ್ಲಿದ್ದ ತಾಳಿಯನ್ನು ಸಿನಿಮೀಯರೀತಿಯಲ್ಲಿ ಕಿತ್ತುಕೊಂಡು ಆತನನ್ನು ಪಕ್ಕಕ್ಕೆ ದೂಡಿ ವಧುವಿಗೆ ತಾಳಿ ಕಟ್ಟಿದ್ದಾನೆ. ಮದುವೆಗೆ ಸೇರಿದ್ದ ಜನರೆಲ್ಲರೂ ಅಚ್ಚರಿಗೊಳಗಗೈ ನೋಡುತ್ತಾ ನಿಂತಿದ್ದಾರೆ. ತಂದೆ-ತಾಯಿ ವಿನೋದ್ ನ ಕೃತ್ಯಕ್ಕೆ ಕೋಪೋದ್ರಕ್ತರಾಗಿದ್ದಾರೆ.
ಈ ವೇಳೆ ವಿನೋದ್ ತಾನು ಅಣ್ಣ ರಾಜೇಶ್‌ ಮದುವೆಯಾಗುತ್ತಿರುವ ವಧುವನ್ನು ಪ್ರೀತಿಸಿದ್ದಾಗಿಯೂ, ಆಕೆಯೂ ತನ್ನನ್ನು ಪ್ರೀತಿಸುತ್ತಿರುವುದಾಗಿಯೂ ಹೇಳಿದ್ದಾನೆ. ರಾಜೇಶ್‌ ವಧುವಿಗೂ ಮದುವೆ ಫಿಕ್ಸ್ ಆಗುವ ಹಂತದಲ್ಲೇ ಆಕೆ ಮತ್ತು ತಾನು ಪರಸ್ಪರ ಪ್ರೀತಿಸಿದ್ದಾಗಿ ವಿನೋದ್ ಹೇಳಿಕೊಂಡಿದ್ದಾನೆ.