ಆಘಾತಕಾರಿ ಘಟನೆಯೊಂದರಲ್ಲಿ 35 ವರ್ಷದ ಗ್ರಾಮ ಪಂಚಾಯಿತಿ ಸದಸ್ಯನೊಬ್ಬ 6 ವರ್ಷದ ಬಾಲೆಯನ್ನು ಕಳೆದ ವಾರ ವಿವಾಹವಾಗಿದ್ದಾನೆ ಎಂದು ಚಿತ್ತೋರಗಢ್ ಮಕ್ಕಳ ಕಲ್ಯಾಣ ಅಧಿಕಾರಿಗಳು ಹೇಳಿದ್ದಾರೆ.
ಬಾಲ್ಯ ವಿವಾಹದ ದೃಶ್ಯಗಳು ವಾಟ್ಸಪ್ ಮೂಲಕ ಒಬ್ಬರಿಂದೊಬ್ಬರಿಗೆ ಹರಡಿ, ತದ ನಂತರ ಜಿಲ್ಲಾಧಿಕಾರಿ ವೇದ್ ಪ್ರಕಾಶ್ ಮತ್ತು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಪ್ರಸನ್ನ ಕುಮಾರ್ ಖಾಮೇಸರಾ ಅವರಿಗೆ ತಲುಪಿದೆ
ಗಂಗ್ರಾರ್ ಗ್ರಾಮ ಪಂಚಾಯಿತಿ ಸದಸ್ಯ ರತನ್ ಜಾಟ್ ಎನ್ನುವ ಆರೋಪಿಯೇ 6 ವರ್ಷದ ಬಾಲೆಯನ್ನು ಪಾಂಡೋಲಿ ಗ್ರಾಮದಲ್ಲಿ ರಹಸ್ಯವಾಗಿ ವಿವಾಹವಾಗಿದ್ದ.ವಿವಾಹದ ನಂತರ ಉಭಯ ಕುಟುಂಬಗಳ ಸದಸ್ಯರು ವಿವಾಹ ಸ್ಥಳದಿಂದ ಪರಾರಿಯಾಗಿದ್ದರು.
ನಿನ್ನೆ ಜಿಲ್ಲಾಧಿಕಾರಿಗಳು, ಪೊಲೀಸ್ ವರಿಷ್ಠ ಮತ್ತು ಮಕ್ಕಳ ಕಲ್ಯಾಣ ಅಧಿಕಾರಿಗಳು ಆರೋಪಿಯ ವಿರುದ್ಧ ಹಾಗೂ ಬಾಲೆಯ ಕುಟುಂಬದ ಸದಸ್ಯಟರ ವಿರುದ್ಧ ಎಫ್ಐಆರ್ ದಾಖಲಿಸಿದ್ದಾರೆ ಎಂದು ಜಿಲ್ಲಾಡಳಿತದ ಅಧಿಕಾರಿಗಳು ತಿಳಿಸಿದ್ದಾರೆ.
ಬಾಲ್ಯ ವಿವಾಹವನ್ನು ರದ್ದುಗೊಳಿಸುವಂತೆ ಕೋರಿ ನ್ಯಾಯಾಲಯದಲ್ಲಿ ಮನವಿ ಸಲ್ಲಿಸಲಾಗುವುದು ಎಂದು ಜಿಲ್ಲಾಧಿಕಾರಿ ವೇದಪ್ರಕಾಶ್ ತಿಳಿಸಿದ್ದಾರೆ. ಆರೋಪಿಯನ್ನು ಶೀಘ್ರವೇ ಬಂಧಿಸಲಾಗುವುದು ಎಂದು ಭರವಸೆ ನೀಡಿದ್ದಾರೆ.