ಪಶ್ಚಿಮ ಬಂಗಾಳ: 42 ಸಚಿವರ ಪೈಕಿ 9 ಜನರ ವಿರುದ್ಧ ಕ್ರಿಮಿನಲ್ ಕೇಸ್

ಮತ್ತೆ ಪುನಃ ಅಧಿಕಾರಕ್ಕೇರಿರುವ ಮಮತಾ ಬ್ಯಾನರ್ಜಿ ನೇತೃತ್ವದ ಸರ್ಕಾರದ 42 ಸಚಿವರಲ್ಲಿ 9 ಜನರು ಕ್ರಿಮಿನಲ್ ಪ್ರಕರಣವನ್ನು ಎದುರಿಸುತ್ತಿದ್ದಾರೆ ಮತ್ತು ಅರ್ಧಕ್ಕೂ ಹೆಚ್ಚು ಸಚಿವರು ಕೋಟ್ಯಾಧಿಪತಿಗಳಾಗಿದ್ದಾರೆ ಎಂದು ತಿಳಿದು ಬಂದಿದೆ. 

ಅಫಿಡವಿಟ್ ವಿಶ್ಲೇಷಣೆ ಆಧಾರದ ಮೇಲೆ ಪಶ್ಚಿಮ ಬಂಗಾಳ ಚುನಾವಣಾ ವಾಚ್ ನೀಡಿರುವ ವರದಿಗಳ ಪ್ರಕಾರ 9 ಸಚಿವರು ತಮ್ಮ ವಿರುದ್ಧ ಕ್ರಿಮಿನಲ್ ಪ್ರಕರಣಗಳಿರುವುದನ್ನು ಘೋಷಿಸಿಕೊಂಡಿದ್ದಾರೆ. ಅದರಲ್ಲಿ 7 ಜನರ ವಿರುದ್ಧ  ಕೊಲೆ, ಅಪಹರಣ, ಕೋಮು ಸೌಹಾರ್ದತೆಗೆ ಧಕ್ಕೆ ತಂದಂತಹ ಗಂಭೀರ ಆರೋಪಗಳಿವೆ. 

57% ಸಚಿವರು ಕೋಟ್ಯಾಧಿಪತಿಗಳಾಗಿದ್ದು ಅವರಲ್ಲಿ ಝಾಕೀರ್ ಹುಸೇನ್(28ಕೋಟಿ) ಎಲ್ಲರಿಗಿಂತ ಹೆಚ್ಚು ಶ್ರೀಮಂತರಾಗಿದ್ದಾರೆ. ವಿಪತ್ತು ಇಲಾಖೆ ಸಚಿವ ಜಾವೇದ್ ಅಹಮದ್ ಖಾನ್, ಹಣಕಾಸು ಮತ್ತು ಕೈಗಾರಿಕಾ ಸಚಿವ ಅಮಿತ್ ಮಿತ್ರಾ ಅವರ ನಂತರದ ಸಾಲಿನಲ್ಲಿ ನಿಂತಿದ್ದಾರೆ. ಚಾರುಮಣಿ ಮಹತಾ ಎಲ್ಲರಿಗಿಂತ ಬಡ ಸಚಿವರಾಗಿದ್ದು 5 ಲಕ್ಷ ಆಸ್ತಿಯನ್ನು ಘೋಷಿಸಿಕೊಂಡಿದ್ದಾರೆ. ಸಚಿವರ ಸರಾಸರಿ ಆಸ್ತಿ 3.36 ಕೋಟಿ ಎಂದು ವರದಿ ತಿಳಿಸಿದೆ. 

ಶೈಕ್ಷಣಿಕ ಅರ್ಹತೆ ಬಗ್ಗೆ ಹೇಳುವುದಾದರೆ 33(79%) ಸಚಿವರು ಪದವೀಧರರು ಅಥವಾ ಉನ್ನತ ಪದವಿಯನ್ನು, 9 ಸಚಿವರು 12ನೇತರಗತಿ ಪಾಸ್ ಮತ್ತು ಅದಕ್ಕಿಂತ ಕೆಳಗಿನ ವಿದ್ಯಾರ್ಹತೆಯನ್ನು ಹೊಂದಿದವರಾಗಿದ್ದಾರೆ. 

ಯುವಜನ ಖಾತೆ ಮತ್ತು ಕ್ರೀಡಾ ಸಚಿವರಾಗಿ ಅಧಿಕಾರ ವಹಿಸಿಕೊಂಡಿರುವ ಲಕ್ಷ್ಮಿ ರತನ್ ಶುಕ್ಲಾ (35)ಅತ್ಯಂತ ಚಿಕ್ಕ ವಯಸ್ಸಿನ ಸಚಿವರೆಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಅವರು ಉತ್ತರ ಹೌರಾ ಕ್ಷೇತ್ರದಿಂದ ಕಣಕ್ಕಿಳಿದಿದ್ದರು.