ರಾಷ್ಟ್ರಪತಿ, ಪ್ರಧಾನಿ ಹುದ್ದೆ ವಜಾ ಬಯಸುತ್ತಿದ್ದ ಮಥುರಾ ಗಲಭೆಕೋರರು

ಮಥುರಾದ ಜವಾಹರ್ ಬಾಗ್ ಪಾರ್ಕ್ ಹಿಂಸಾಚಾರಕ್ಕೆ ಕಾರಣವಾದ ಆಜಾದ್‌ ಭಾರತ್‌ ವಿಧಿಕ್‌ ವೈಚಾರಿಕ್‌ ಕ್ರಾಂತಿ ಸತ್ಯಾಗ್ರಹಿ ಸಂಘಟನೆ ಕೆಲವು ವಿಚಿತ್ರ ಬೇಡಿಕೆಗಳನ್ನು ಮುಂದಿಟ್ಟುಕೊಂಡು ಕಳೆದ ಎರಡು ವರ್ಷಗಳಿಂದ ಪ್ರತಿಭಟನೆ ನಡೆಸುತ್ತಿತ್ತು.

ತಾವು ಸ್ವಾತಂತ್ರ್ಯ ಸೇನಾನಿ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ ಅನುನಾಯಿಗಳು ಎಂದು ಹೇಳಿಕೊಳ್ಳುತ್ತಿರುವ ಈ ಗುಂಪು ರಾಷ್ಟ್ರಪತಿ, ಪ್ರಧಾನಿ ಹುದ್ದೆ ಬೇಡ ಎಂಬ ಬೇಡಿಕೆಯನ್ನಿಟ್ಟುಕೊಂಡು ಪ್ರತಿಭಟನೆ ನಡೆಸುತ್ತಿತ್ತು. 

ನೇತಾಜಿ ಅವರಿಗೆ ಸಂಬಂಧಿಸಿದ ಎಲ್ಲ ಕಡತಗಳನ್ನು ಬಹಿರಂಗ ಪಡಿಸಬೇಕು ಎಂದು ಆಗ್ರಹಿಸುತ್ತಿರುವ ಈ ಗುಂಪು ರೂಪಾಯಿ ಬದಲಿಗೆ ಆಜಾದ್‌ ಹಿಂದ್‌ ಫೌಜ್‌  ಕರೆನ್ಸಿ ಜಾರಿಗೆ ತರಬೇಕು ಎಂದು ಹಠ ಹಿಡಿದಿತ್ತು.

ಒಂದು ರೂಪಾಯಿಗೆ 40 ಲೀಟರ್‌ ಪೆಟ್ರೋಲ್‌ ಅಥವಾ 60 ಲೀಟರ್‌ ಡೀಸೆಲ್‌ ದೊರೆಯುವಂತಾಗಬೇಕು, ಮಾಂಸಾಹಾರ ನಿಷೇಧಿಸಿ, ಮಾಂಸಾಹಾರಿಗಳನ್ನು ಶಿಕ್ಷಿಸಬೇಕು ಎಂಬುದು ಈ ಗುಂಪಿನ ಇತರ ಬೇಡಿಕೆಗಳಾಗಿವೆ. 

ಮಥುರಾದಲ್ಲಿ ಜವಾಹರ್‌ ಬಾಗ್‌ ಎಂಬ 260 ಎಕರೆಯಷ್ಟು ವಿಶಾಲವಾದ ಪ್ರದೇಶವಿದ್ದು ಪ್ರಸಿದ್ಧ ಧಾರ್ಮಿಕ ನಾಯಕ ಜೈ ಗುರುದೇವ್‌ 2012ರಲ್ಲಿ ನಿಧನ ಹೊಂದಿದ ಬಳಿಕ 3,000 ಜನರುಳ್ಳ ಪಡೆಯೊಂದು ಜವಾಹರ್‌ ಬಾಗ್‌ನಲ್ಲಿ ಸ್ಥಳವನ್ನು ಆಕ್ರಮಿಸಿಕೊಂಡು 'ಆಜಾದ್‌ ಭಾರತ್‌ ವಿಧಿಕ್‌ ವೈಚಾರಿಕ್‌ ಕ್ರಾಂತಿ ಸತ್ಯಾಗ್ರಹಿ' ಎಂಬ ಹೆಸರಿನಲ್ಲಿ ಧರಣಿ ನಡೆಸುತ್ತಿತ್ತು. ಹೈಕೋರ್ಟ್ ಆದೇಶದ ಮೇಲೆ ಆ ಸ್ಥಳವನ್ನು ತೆರವುಗೊಳಿಸಲು ಪ್ರಯತ್ನಪಟ್ಟಾಗ ಭುಗಿಲೆದ್ದ ಗಲಭೆಯಲ್ಲಿ ಎಸ್‌ಪಿ, ಠಾಣಾಧಿಕಾರಿ ಸೇರಿದಂತೆ ಈವರೆಗೆ 24 ಜನರು ಸಾವನ್ನಪ್ಪಿದ್ದಾರೆ. 

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.