ಗರ್ಲ್ ಫ್ರೆಂಡ್‌ನ್ನು ನೋಡಲೆಂದು ನಕಲಿ ಟಿಕೆಟ್ ಬಳಸಿ ದೆಹಲಿ ವಿಮಾನ ನಿಲ್ದಾಣ ಪ್ರವೇಶ

ತನ್ನ ಗರ್ಲ್ ಫ್ರೆಂಡ್‌ನ್ನು ನೋಡಬೇಕೆಂಬ ತವಕದಲ್ಲಿ ಇಟಾಲಿಯನ್ ಪ್ರಜೆಯೊಬ್ಬ ಆಗಸ್ಟ್ 14 ರ ಸಂಜೆ ನಕಲಿ ಇ-ಟಿಕೆಟ್ ಬಳಸಿ ನವದೆಹಲಿಯ ಇಂದಿರಾ ಗಾಂಧಿ ವಿಮಾನ ನಿಲ್ದಾಣ ಪ್ರವೇಶಿಸಿದ್ದ ಎಂದು ತಿಳಿದು ಬಂದಿದೆ. ಸ್ವಾತಂತ್ರ್ಯೋತ್ಸವದ ಮುನ್ನಾದಿನವಾಗಿದ್ದರಿಂದ ಭಾರಿ ಭದ್ರತೆ ಒದಗಿಸಲಾಗಿದ್ದರೂ ಆತ ನಿಲ್ದಾಣವನ್ನು ಪ್ರವೇಶಿಸಿದ್ದು ಭದ್ರತಾವ್ಯವಸ್ಥೆಯ ಬಗ್ಗೆ ಪ್ರಶ್ನೆಯನ್ನು ಎತ್ತುವಂತೆ ಮಾಡಿದೆ.

ವಿಮಾನ ನಿಲ್ದಾಣಕ್ಕೆ ಭದ್ರತೆ ಒದಗಿಸುವ ಕೇಂದ್ರ ಕೈಗಾರಿಕಾ ಭದ್ರತಾ ಪಡೆ (ಸಿಐಎಸ್ಎಫ್ ) ಚೆಕ್-ಇನ್ ಪ್ರದೇಶದಲ್ಲಿ ಶಂಕಾಸ್ಪದ ಪ್ರಯಾಣಿಕನನ್ನು ಕಂಡು ತಕ್ಷಣ ವಶಕ್ಕೆ ಪಡೆದುಕೊಂಡು ವಿಚಾರಣೆಗೊಳಪಡಿಸಲಾಗಿದೆ. 

ತಾನು ಪ್ರಯಾಣಿಕನೆಂದು ಸಾಬೀತು ಪಡಿಸಲು ಆತನ ಬಳಿ ಯಾವುದೇ ಟಿಕೆಟ್ ಇರಲಿಲ್ಲ. 

ಆತನ ಗೆಳತಿ ಚೀನಾ ಈಸ್ಟರ್ನ್ ಏರ್‌ಲೈನ್ಸ್ ಮೂಲಕ ಆಗಸ್ಟ್ 15ರ ನಸುಕಿನ ಜಾವ 2.55ಕ್ಕೆ ಪ್ರಯಾಣಿಸಬೇಕಿತ್ತು. ಆಕೆಯನ್ನು ಭೇಟಿಯಾಗಲು ಆತ ನಕಲಿ ಟಿಕೆಟ್ ಬಳಸಿ ವಿಮಾನ ನಿಲ್ದಾಣವನ್ನು ಪ್ರವೇಶಿಸಿದ್ದ ಎಂದು ತಿಳಿದು ಬಂದಿದೆ. ಆತ ತನ್ನ ತಪ್ಪನ್ನು ಒಪ್ಪಿಕೊಂಡಿದ್ದು ಸದ್ಯ ಪೊಲೀಸರ ವಶದಲ್ಲಿದ್ದಾನೆ.

ಆಗಸ್ಟ್ 15 ರಂದು ಮೊಸ್ಕೋಗೆ ತೆರಳಲಿದ್ದ ಏರೋಫ್ಲೊಟ್ ವಿಮಾನದ ಟಿಕೆಟ್ ಬಳಸಿ ಆತ ನಿಲ್ದಾಣವನ್ನು ಪ್ರವೇಶಿಸಿದ್ದ ಎಂಬುದು ಸಿಸಿ ಟಿವಿ ದೃಶ್ಯಾವಳಿಗಳಿಂದ ಸಾಬೀತಾಗಿದೆ. 

ಆತ ಅದೇ ವಿಮಾನದಿಂದ ಮಾಸ್ಕೋಗೆ ತೆರಳುವ ಟಿಕೆಟ್ ಹೊಂದಿದ್ದ. ಆದರೆ ಅದು ಆಗಸ್ಟ್ 16ರದಾಗಿತ್ತು. ಫೋಟೋ ಎಡಿಟಿಂಗ್ ಸಾಫ್ಟವೇರ್ ಬಳಸಿ 16ನ್ನು 15 ಎಂದು ಬದಲಾಯಿಸಿದ್ದ ಆತ ಟರ್ಮಿನಲ್ 3 ನ್ನು ಪ್ರವೇಶಿಸಿದ್ದ. ಏರ್‌ಲೈನ್ಸ್ ಆತನ ವಿವರಗಳನ್ನು ದೃಢೀಕರಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.