ಮಹಾರಾಷ್ಟ್ರ: ಬಿಜೆಪಿ ಸಚಿವ ಏಕನಾಥ್ ಖಾಡ್ಸೆ ರಾಜೀನಾಮೆ

ಭೂಗತ ದೊರೆ ದಾವೂದ್ ಇಬ್ರಾಹಿಂನೊಂದಿಗಿನ ದೂರವಾಣಿ ಕರೆಗಳ ಆರೋಪ ಮತ್ತು ಭೂ ಕಬಳಿಕೆ ಆರೋಪ ಹೊತ್ತ ಮಹಾರಾಷ್ಟ್ರದ ಕಂದಾಯ ಖಾತೆ ಸಚಿವ ಏಕನಾಥ್ ಖಾಡ್ಸೆ ತಮ್ಮ ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ. 

ನಿಮ್ಮನ್ನು ಸಚಿವ ಸ್ಥಾನದಲ್ಲಿ ಮುಂದುವರಿಸುವುದರಿಂದ ಸಚಿವ ಸಂಪುಟಕ್ಕೆ ಮತ್ತು ಬಿಜೆಪಿ ಸರಕಾರಕ್ಕೆ ಕೆಟ್ಟಹೆಸರು ಬರುವುದರಿಂದ ರಾಜೀನಾಮೆ ನೀಡುವುದೊಂದೆ ದಾರಿ ಎಂದು ಬಿಜೆಪಿ ಕೇಂದ್ರೀಯ ನಾಯಕತ್ವ ಕಠಿಣ ಆದೇಶ ನೀಡಿದ ನಂತರ ಖಾಡ್ಸೆ ಸಚಿವ್ ಸ್ಥಾನಕ್ಕೆ ಗುಡ್‌ಬೈ ಹೇಳಿದ್ದಾರೆ.

ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ಅವರನ್ನು ಅವರ ಅಧಿಕೃತ ನಿವಾಸ ''ವರ್ಷಾ'' ದಲ್ಲಿ ಭೇಟಿಯಾದ ಖಾಡ್ಸೆ ತಮ್ಮ ರಾಜೀನಾಮೆ ಪತ್ರವನ್ನು ನೀಡಿದರು.

ಖಾಡ್ಸೆಯವರ ಹಗರಣದ ಬಗ್ಗೆ ಪ್ರಧಾನಿ ಮೋದಿ ಮತ್ತು ಬಿಜೆಪಿ ರಾಷ್ಟ್ರಾಧ್ಯಕ್ಷ ಅಮಿತ್ ಶಾ ಅಸಮಾಧಾನ ವ್ಯಕ್ತಪಡಿಸಿದ್ದರು.

ಸಚಿವ ಸಂಪುಟದಲ್ಲಿ ಎರಡನೇ ಪ್ರಭಾವಿ ಸಚಿವರಾಗಿದ್ದ ಖಾಡ್ಸೆ, ಕರಾಚಿಯಿಂದ ದಾವೂದ್ ದೂರವಾಣಿಗಳ ಕರೆ ಬಹಿರಂಗವಾಗಿರುವುದು ಮತ್ತು ಭೂ ಕಬಳಿಕೆ ಸೇರಿದಂತೆ ಸರಣಿ ಹಗರಣಗಳು ಬಹಿರಂಗವಾಗಿದ್ದರಿಂದ ರಾಜೀನಾಮೆ ನೀಡುವುದು ಅನಿವಾರ್ಯವಾಗಿತ್ತು ಎನ್ನಲಾಗಿದೆ. 

ಮಹಾರಾಷ್ಟ್ರ ಕೈಗಾರಿಕೆ ಅಭಿವೃದ್ಧಿ ನಿಗಮದಿಂದ 40 ಕೋಟಿ ಬೆಲೆಬಾಳುವ ಮೂರು ಏಕರೆ ಭೂಮಿಯನ್ನು ಕೇವಲ 3,75 ಕೋಟಿಗಳಿಗೆ ಖರೀದಿಸಿ ತಮ್ಮ ಪತ್ನಿ ಮತ್ತು ಅಳಿಯನ ಹೆಸರಿಗೆ ವರ್ಗಾಯಿಸಿದ್ದರು. 

ನಿನ್ನೆ ರಾತ್ರಿ ಸುದ್ದಿಗಾರರೊಂದಿಗೆ ಮಾತನಾಡಿದ ಖಾಡ್ಸೆ, ಆಧಾರ ರಹಿತ ಆರೋಪಗಳ ಕುರಿತಂತೆ ಬಿಜೆಪಿ ಕೇಂದ್ರೀಯ ನಾಯಕತ್ವ ಯಾವುದೇ ನಿರ್ದೇಶನ ನೀಡಿಲ್ಲ ಎಂದು ಹೇಳಿಕೆ ನೀಡಿದ್ದರು. 

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.