ರಿಜಿಜು, ನೋಟು ನಿಷೇಧ; ಪ್ರತಿಪಕ್ಷ ಕೋಲಾಹಲ, ಲೋಕಸಭೆ ಮುಂದಕ್ಕೆ

ಕೇಂದ್ರ ಗೃಹ ಖಾತೆ ಸಹಾಯಕ ಸಚಿವ, ಕಿರಣ್ ರಿಜಿಜು ವಿವಾದ ಮತ್ತು ನೋಟು ನಿಷೇಧಕ್ಕೆ ಸಂಬಂಧಿಸಿದಂತೆ ಪ್ರತಿಪಕ್ಷಗಳು ನಡೆಸಿದ ಕೋಲಾಹಲ ಲೋಕಸಭೆಯನ್ನು ಬಲವಂತವಾಗಿ ಮಧ್ಯಾಹ್ನದವರೆಗೆ ಮುಂದೂಡುವಂತೆ ಮಾಡಿತು.

ಮುಂಜಾನೆ ಕಲಾಪ ಪ್ರಾರಂಭವಾಗುತ್ತಿದ್ದಂತೆ, ಕಾಂಗ್ರೆಸ್, ಟಿಎಂಸಿ, ಎಡ ಪಕ್ಷಗಳು ಸೇರಿದಂತೆ ಪ್ರತಿಪಕ್ಷಗಳು ರಿಜಿಜು ಮತ್ತು ನೋಟು ನಿಷೇಧ ಮತ್ತು ಕೆಲ ನಿರ್ದಿಷ್ಟ ವಿಷಯಗಳಿಗೆ ಸಂಬಂಧಿಸಿದಂತೆ ಉತ್ತರ ನೀಡುವಂತೆ ಆಗ್ರಹ ಮಾಡಿದವು. ಎಡ ಪಕ್ಷಗಳ ಇಬ್ಬರು ಸದಸ್ಯರು ಸದನದ ಬಾವಿಗಿಳಿದು ಗಲಾಟೆ ಮಾಡಿದರು. 

ಅರುಣಾಚಲ ಪ್ರದೇಶದಲ್ಲಿ 600 ಮೆಗಾ ವ್ಯಾಟ್‌  ಜಲ ವಿದ್ಯುತ್‌ ಘಟಕ ನಿರ್ಮಾಣಕ್ಕೆ ಸಂಬಂಧಿಸಿದಂತೆ ಸಚಿವ ಕಿರಣ್ ರಿಜಿಜು ಅವ್ಯವಹಾರ ನಡೆಸಿದ್ದಾರೆ. ತಮ್ಮ ಅಧಿಕಾರವನ್ನವರು ದುರ್ಬಳಕೆ ಮಾಡಿಕೊಂಡಿದ್ದಾರೆ ಎಂದು ವಿರೋಧ ಪಕ್ಷದವರು ಆರೋಪಿಸಿದ್ದಾರೆ. 

ಗದ್ದಲ ಮುಂದುವರೆಯುತ್ತಿದ್ದಂತೆ ಸ್ಪೀಕರ್ ಸುಮಿತ್ರಾ ಮಹಾಜನ್ ಮಧ್ಯಾಹ್ನದವರೆಗೆ ಕಲಾಪವನ್ನು ಮುಂದೂಡಿದರು.