ವಿಪಕ್ಷ ನಾಯಕರನ್ನು ನೋಡಿ ನಕ್ಕರೆ ಅಪರಾಧ ಆಗಲ್ಲ. ಮನುಷ್ಯರಿಗೆ ಮಾತ್ರ ನಗುಲು ಸಾಧ್ಯ, ಮೃಗಗಳಿಗೆ ನಗೋಕೆ ಆಗಲ್ಲ ಎಂದು ಮಾಜಿ ಮುಖ್ಯಮಂತ್ರಿ ಪನ್ನೀರ್ ಸೆಲ್ವಂ ಅವರು ಚಿನ್ನಮ್ಮ ಶಿಶಿಕಲಾ ನಟರಾಜನ್ ಆರೋಪಕ್ಕೆ ತಿರುಗೇಟು ನೀಡಿದ್ದಾರೆ.
ಚೆನ್ನೈನ ಮರೀನಾ ಬೀಚ್ ಬಳಿ ಇರುವ ಜಯಲಲಿತಾ ಅವರ ಸಮಾಧಿ ಬಳಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ನಾನು ಎಐಡಿಎಂಕೆ ಪಕ್ಷದ ಕಟ್ಟಾಳು. ನನ್ನನ್ನು ಪಕ್ಷದ ಖಜಾಂಚಿ ಆಗಿ ನೇಮಿಸಿದ್ದ ಅಮ್ಮ ಜಯಲಲಿತಾ. ನನ್ನನ್ನು ಖಜಾಂಚಿ ಸ್ಥಾನದಿಂದ ಕೆಳಗಿಳಿಸಲ ಯಾರಿಂದಲೂ ಸಾಧ್ಯವಿಲ್ಲ ಎಂದು ಸವಾಲ್ ಎಸೆದರು.
ಪಕ್ಷದಲ್ಲಿ ಆಗುತ್ತಿರುವ ರಾಜಕೀಯ ಬೆಳವಣಿಗೆಯ ಕುರಿತು ರಾಜ್ಯದ ಜನತೆಯ ಮುಂದೆ ಸತ್ಯ ಹೇಳುವಂತೆ ಅಮ್ಮ ಜಯಲಲಿತಾ ಆವರ ಆತ್ಮ ಸೂಚನೆ ನೀಡಿದೆ. ಹೀಗಾಗಿ ಜನತೆಯ ಮುಂದೆ ಸತ್ಯ ಹೇಳುತ್ತಿದ್ದೇನೆ. ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಲು ಚಿನ್ನಮ್ಮ ಶಶಿಕಲಾ ನಟರಾಜನ್ ಅವರ ಬಲವಂತವೇ ಕಾರಣ ಎಂದು ಆರೋಪಿಸಿದರು.
ನನ್ನನ್ನ ನಿರಂತರವಾಗಿ ಅವಮಾನಿಸಲಾಯ್ತು ಮತ್ತು ಬಲವಂತವಾಗಿ ನನ್ನ ರಾಜೀನಾಮೆ ಪಡೆಯಲಾಯ್ತು. ಶಶಿಕಲಾ ಬೆಂಬಲಿಗರಿಂದ ನನ್ನ ಮೇಲೆ ಒತ್ತಡವಿದೆ ಎಂದು ಮಾಜಿ ಮುಖ್ಯಮಂತ್ರಿ ಪನ್ನೀರ್ ಸೆಲ್ವಂ ಪಕ್ಷದ ವಿರುದ್ಧ ಬಂಡಾಯ ಎದ್ದಿದ್ದರು.