ಜಿಶಾ ಅತ್ಯಾಚಾರ, ಕೊಲೆ ಪ್ರಕರಣ: ಕೊನೆಗೂ ಆರೋಪಿ ಬಂಧನ

ದೇಶವನ್ನೇ ಬೆಚ್ಚಿ ಬೀಳಿಸಿದ ಕಾನೂನು ವಿದ್ಯಾರ್ಥಿನಿ ಅತ್ಯಾಚಾರ ಮತ್ತು  ಭೀಕರ ಕೊಲೆ ಪ್ರಕರಣದ ಆರೋಪಿಯನ್ನು ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಆರೋಪಿ ಆಸ್ಸಾಂ ಮೂಲದವನಾಗಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಹೇಯ ಕೃತ್ಯದ ರೂವಾರಿಗಳಿಗಾಗಿ ಪೊಲೀಸರು ತೀವ್ರ ಶೋಧ ಕಾರ್ಯ ನಡೆಸಿದ್ದರು. ಘಟನೆ ನಡೆದ ಬರೊಬ್ಬರಿ 50 ದಿನಗಳ ಬಳಿಕ ಆತನನ್ನು ಕೊಚ್ಚಿಯಲ್ಲಿ ಬಂಧಿಸಲಾಗಿದ್ದು ವಿಚಾರಣೆಗಾಗಿ ರಹಸ್ಯ ಸ್ಥಳಕ್ಕೆ ಕರೆದೊಯ್ಯಲಾಗಿದೆ. 

ತನ್ನ ತಪ್ಪನ್ನು ಒಪ್ಪಿಕೊಂಡಿರುವ ಆರೋಪಿ ತಾನು ಜಿಶಾ ನೆರೆಮನೆವಾಸಿಯಾಗಿದ್ದು ಆಕೆಯ ಜತೆ ಸ್ನೇಹವಿತ್ತು ಎಂದು ಹೇಳಿದ್ದಾನೆ ಎಂದು ವರದಿಯಾಗಿದೆ. 

ಘಟನೆ ನಡೆದ ಸ್ಥಳದಲ್ಲಾದ ರಕ್ತಮೆತ್ತಿದ ಚಪ್ಪಲಿನ ಗುರುತುಗಳ ಆಧಾರದ ಮೇಲೆ ಕಾರ್ಯಾಚರಣೆ ನಡೆಸಿದ್ದ ಪೊಲೀಸರಿಗೆ ಮಹತ್ವದ ಸುಳಿವು ಸಿಕ್ಕಿತ್ತು. ಆ ಚಪ್ಪಲಿ ಕೊಂಡುಕೊಂಡಿದ್ದ ಅಂಗಡಿ ಮಾಲೀಕ ಸಹ ಶಂಕಿತ ಆರೋಪಿಯನ್ನು ಗುರುತಿಸಿದ್ದಾನೆ. 

ಕೆಲವು ವರದಿಗಳ ಪ್ರಕಾರ ಶಂಕಿತನ ಜತೆಗೆ ಮತ್ತೆ 3-4 ಆರೋಪಿಗಳನ್ನು ಸಹ ಪೊಲೀಸರು ಬಂಧಿಸಿದ್ದಾರೆ. 

ಬಡ ದಲಿತ ಕುಟುಂಬಕ್ಕೆ ಸೇರಿದ್ದ ಜಿಶಾ ಎಪ್ರಿಲ್ 28 ರಂದು ಅತ್ಯಾಚಾರಕ್ಕೊಳಗಾಗಿ ಅತ್ಯಂತ ಭೀಕರವಾಗಿ ಹತ್ಯೆಯಾಗಿದ್ದಳು.