ಹಿಂದೆಂದೂ ಕೇಳರಿಯದಂತಹ, ಕಲ್ಪಿಸಲಾಗದ ಘಟನೆ ಇದು. ತಾಯಂದಿರ ದಿನಾಚರಣೆಯ ಒಂದು ದಿನದ ಬಳಿಕ ಈ ಹೇಯ ಕೃತ್ಯ ಬೆಳಕಿಗೆ ಬಂದಿದೆ.
ತನ್ನ ಸ್ವಂತ ಮಗಳ ಕೈಕಾಲು ಕಟ್ಟಿ ಪಕ್ಕದ ಮನೆಯ ಯುವಕನಿಗೆ ಅತ್ಯಾಚಾರ ನಡೆಸಲು ತಾಯಿಯೇ ಅನುವು ಮಾಡಿಕೊಡುತ್ತಿದ್ದ ಘಟನೆ ಕಾನ್ಪುರದಲ್ಲಿ ನಡೆದಿದೆ. ಬಾಲಕಿ ಅಪ್ರಾಪ್ತಳಾಗಿದ್ದು ಕಳೆದೆರಡು ವರ್ಷಗಳಿಂದ ಮನೆಯಲ್ಲಿ ತಂದೆ ಇಲ್ಲದ ಸಮಯದಲ್ಲಿ ಈ ದೌರ್ಜನ್ಯ ನಡೆಯುತ್ತಿತ್ತು ಎಂದು ಪೊಲೀಸ್ ವಿಚಾರಣೆ ಸಂದರ್ಭದಲ್ಲಿ ಹೇಳಿಕೊಂಡಿದ್ದಾಳೆ.
ಕಳೆದ ಎರಡು ವರ್ಷಗಳಿಂದ ನಿರಂತರವಾಗಿ ಬಾಲಕಿ ಮೇಲೆ ಪಕ್ಕದ ಮನೆಯ ರಾಜು ಎಂಬ ಆರೋಪಿ ಅತ್ಯಾಚಾರ ಎಸಗಿದ್ದಾನೆ ಎನ್ನಲಾಗಿದೆ. ಇದಕ್ಕೆ ಬಾಲಕಿಯ ಸ್ವಂತ ತಾಯಿ ಕೂಡ ಸಾಥ್ ನೀಡಿದ್ದು, ಯಾರಿಗಾದರೂ ವಿಷಯ ತಿಳಿಸಿದರೆ ಕೊಲೆ ಮಾಡುವುದಾಗಿ ಬೆದರಿಕೆ ಕೂಡ ಹಾಕಿದ್ದರು ಎನ್ನಲಾಗಿದೆ.
ಮನೆಯ ಮರ್ಯಾದೆ ಹಾಳಾಗುತ್ತದೆ ಮತ್ತು ತನ್ನ ತಂದೆ-ತಾಯಿ ಸಂಬಂಧ ಕೆಡುತ್ತದೆ ಎಂಬ ಕಾರಣಕ್ಕೆ ಎಲ್ಲ ದೌರ್ಜನ್ಯವನ್ನು ಸಹಿಸಿಕೊಂಡಿದ್ದ ಬಾಲಕಿಗೆ ತಾಯಿ ಆರೋಪಿ ರಾಜುವೊಂದಿಗೆ ಮದುವೆಯಾಗುವಂತೆ ಒತ್ತಡ ಹೇರಿದಾಗ ಬೇರೆ ದಾರಿ ಕಾಣದೆ ತಂದೆ ಬಳಿ ಎಲ್ಲ ವಿಷಯವನ್ನು ಹೇಳಿಕೊಂಡಿದ್ದಾಳೆ.
ಪತ್ನಿಯ ದುಷ್ಕೃತ್ಯದಿಂದ ಆಘಾತಗೊಂಡ ತಂದೆ ಪತ್ನಿ ಮತ್ತು ಆರೋಪಿ ರಾಜು ವಿರುದ್ಧ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾರೆ.
ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಬಾಲಕಿಯ ತಾಯಿ ಹಾಗೂ ಆರೋಪಿ ರಾಜು ಇಬ್ಬರನ್ನೂ ಬಂಧಿಸಿದ್ದು ವಿಚಾರಣೆ ನಡೆಸುತ್ತಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
