ಜೂನಿಯರ್ ಹಾಕಿ ವಿಶ್ವಕಪ್ ಗೆದ್ದ ತಂಡಕ್ಕೆ ಮೋದಿ ಅಭಿನಂದನೆ

15 ವರ್ಷಗಳ ಅಂತರದ ಬಳಿಕ ಭಾರತಕ್ಕೆ ವಿಶ್ವಕಪ್ ತಂದಕೊಟ್ಟ ಜೂನಿಯರ್ ಹಾಕಿ ತಂಡಕ್ಕೆ ಪ್ರಧಾನಿ ಮೋದಿ ಅಭಿನಂದನೆ ಸಲ್ಲಿಸಿದ್ದಾರೆ.

ಭಾರತ ಪ್ರಶಸ್ತಿ ಗೆಲ್ಲುತ್ತಿದ್ದಂತೆ ಪ್ರಧಾನಿ ಮೋದಿ, ನಮ್ಮ ಯುವತಂಡದ ಬಗ್ಗೆ ಅತ್ಯಂತ ಹೆಮ್ಮೆಯಾಗುತ್ತಿದೆ. ವಿಶ್ವಕಪ್ ಗೆದ್ದ ನಮ್ಮ 

ಜೂನಿಯರ್ ಹಾಕಿ ತಂಡಕ್ಕೆ ಅಭಿನಂದನೆಗಳು ಎಂದು ಟ್ವೀಟ್ ಮಾಡಿದ್ದಾರೆ.

ಲಕ್ನೋದಲ್ಲಿ ನಡೆದ ಕಿರಿಯರ ವಿಶ್ವಕಪ್ ಹಾಕಿ ಪಂದ್ಯಾವಳಿಯ ಫೈನಲ್ ನಲ್ಲಿ ಭಾರತ ತಂಡ ಬೆಲ್ಜಿಯಂ ತಂಡವನ್ನು 2-1 ಅಂತರದಿಂದ ಸೋಲಿಸಿತ್ತು. ಈ ಮೂಲಕ 15 ವರ್ಷಗಳ ಬರ ನೀಗಿಸಿತ್ತು.

ತವರಿನ ಪ್ರೇಕ್ಷಕರೆದುರು ವಿಜೃಂಭಿಸಿದ ಭಾರತದ ಹುಡುಗರ ಮೊದಲಾರ್ಧದಲ್ಲಿಯೇ ಎರಡು ಗೋಲು ಗಳಿಸಿದರು. ಬೆಲ್ಜಿಯಂ ಪಂದ್ಯ ಅಂತ್ಯವಾಗುವ ಕೆಲವೇ ಕ್ಷಣಗಳ ಮೊದಲು ಒಂದು ಗೋಲು ಬಾರಿಸಿ ಮಾನ ಉಳಿಸಿಕೊಂಡಿತು.

ಭಾರತದ ಪರ 8 ನೇ ನಿಮಿಷದಲ್ಲಿ ಗುರ್ಜಂತ್ ಸಿಂಗ್ ಮತ್ತು ಸಿಮ್ರತ್ ಜಿತ್ ಸಿಂಗ್ 22 ನೇ ನಿಮಿಷದಲ್ಲಿ ಒಂದು ಗೋಲು ಬಾರಿಸಿದರು. ವಿಶೇಷವೆಂದರೆ ಪಂದ್ಯ ವೀಕ್ಷಿಸಲು ಖುದ್ದು ಉತ್ತರ ಪ್ರದೇಶ ಮುಖ್ಯಮಂತ್ರಿ ಅಖಿಲೇಶ್ ಯಾದವ್ ಕೂಡ ಆಗಮಿಸಿದ್ದರು.

ಈ ಹಿಂದೆ 2001ರಲ್ಲಿ ಭಾರತ ಕಿರಿಯರ ತಂಡ ವಿಶ್ವಕಪ್ ಹಾಕಿಯನ್ನು ಎತ್ತಿ ಹಿಡಿದಿತ್ತು. ಹಿರಿಯರ ವಿಭಾಗದಲ್ಲಿ ಭಾರತ 8 ಬಾರಿ ಒಲಿಂಪಿಕ್ ಚಾಂಪಿಯನ್ ಆಗಿದ್ದು ಒಂದು ಬಾರಿ ವಿಶ್ವ ಕಪ್‌ನ್ನು ಗೆದ್ದಿದೆ. 

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ.