ಮೋದಿ ವಿರುದ್ಧ ಬಂಡೆಗಲ್ಲಿನಂತೆ ನಿಂತವನು ನಾನೊಬ್ಬನೇ : ಕೇಜ್ರಿವಾಲ್

ಎಂದಿನಂತೆ ಮತ್ತೆ ಪ್ರಧಾನಿ ಮೋದಿ ವಿರುದ್ಧ ವಾಗ್ದಾಳಿ ನಡೆಸಿರುವ ದೆಹಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್, ಮೋದಿಯವರ ತಪ್ಪುಗಳ ವಿರುದ್ಧ ಬಂಡೆಗಲ್ಲಿನಂತೆ ನಿಂತವನು ನಾನೊಬ್ಬನೇ ಎಂದು ಹೇಳಿದ್ದಾರೆ. 

ಮಾಧ್ಯಮಗಳೊಂದಿಗೆ ಮಾತನ್ನಾಡುತ್ತಿದ್ದ ಕೇಜ್ರಿವಾಲ್, ಪ್ರಧಾನಿ ಮೋದಿ ಎಚ್ಚರಿಕೆ ನೀಡುತ್ತ ನನ್ನ ವಿರುದ್ದ ಅನೇಕ ಎಫ್ಐಆರ್ ಮತ್ತು ಸಿಬಿಐ ದಾಳಿಗಳನ್ನು ನಡೆಸಲಾಯಿತು. ಇಂತಹ ದಬ್ಬಾಳಿಕೆಯ ತಂತ್ರಗಳು ನನ್ನನ್ನು ಭಯ ಪಡಿಸುವುದಿಲ್ಲ ಅಥವಾ ಆಮ್ ಆದ್ಮಿ ಪಕ್ಷವನ್ನು ತಡೆ ಹಿಡಿಯುವುದಿಲ್ಲ ಎಂದಿದ್ದಾರೆ. 

ಸೋನಿಯಾ ಗಾಂಧಿ ಅಳಿಯ ರಾಬರ್ಟ್ ವಾರ್ದಾ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ಬಜೆಪಿ ಚುನಾವಣೆ ಪೂರ್ವ ನೀಡಿದ್ದ ಭರವಸೆ ಏನಾಯಿತು ಎಂಬುದರ ಬಗ್ಗೆ ಆಶ್ಚರ್ಯ ವ್ಯಕ್ತ ಪಡಿಸಿರುವ ಅವರು, ಆಗಸ್ಟಾ ವೆಸ್ಟ್‌ಲ್ಯಾಂಡ್ ಹಗರಣದಲ್ಲಿ ಸೋನಿಯಾ ವಿರುದ್ಧ ಕೇಂದ್ರ ನಿಷ್ಕ್ರಿಯವಾಗಿರುವುದನ್ನು ಮರಳಿ ಪ್ರಶ್ನಿಸಿದ್ದಾರೆ.

ನಾನು ರಾಹುಲ್ ಗಾಂಧಿ ಅಲ್ಲ, ಸೋನಿಯಾ ಗಾಂಧಿ, ರಾಬರ್ಟ್ ವಾದ್ರಾ ಅಲ್ಲ,ಎಂಬುದನ್ನು ಮೋದಿ ಅವರಿಗೆ ಮನದಟ್ಟು ಮಾಡ ಬಯಸುತ್ತೇನೆ. ಸತ್ತರೂ ವಂಚನೆಯನ್ನು ಸಹಿಸಿಕೊಳ್ಳಲಾರೆ ಎಂದು ಅವರು ಗುಡುಗಿದ್ದಾರೆ. 

"ಪ್ರಶ್ನೆ ಏನೆಂದರೆ ನನ್ನ ವಿರುದ್ಧವೇ ಇಂತಹ ದಾಳಿಗಳು ಅಥವಾ ಎಫ್ಐಆರ್‌ಗಳು ಏಕೆ ಎಂಬುದು? ಇಂತಹ ತಂತ್ರಗಳನ್ನು ಬಳಸಿ ಅವರು ಅನೇಕ ಜನರಿಗೆ ಭಯ ಪಡಿಸುವಲ್ಲಿ ಯಶ ಕಂಡಿದ್ದಾರೆ. ಇಂತಹ ಬೆದರಿಕೆ ತಂತ್ರಗಳನ್ನು ವಿರುದ್ಧ ಗಟ್ಟಿಯಾಗಿ ನಿಂತ ಏಕೈಕ ವ್ಯಕ್ತಿ ನಾನೊಬ್ಬನೇ," ಎಂದು ಕೇಜ್ರಿವಾಲ್ ಹೇಳಿದ್ದಾರೆ.