ಪಾಕ್ ಧ್ವಜವನ್ನು ಹಾರಿಸಿದ ಸ್ವಾತಂತ್ರ್ಯ ಹೋರಾಟಗಾರರ ಮೊಮ್ಮಗ

ಕಾಶ್ಮೀರ ಕಣಿವೆಯಲ್ಲಿ ಯೋಧನೊಬ್ಬ ಪ್ರಾಣಾಪಾಯವನ್ನು ಲೆಕ್ಕಿಸದೇ ದುಷ್ಕರ್ಮಿಗಳು ನೆಟ್ಟಿದ್ದ ಪಾಕಿಸ್ತಾನ ಧ್ವಜವನ್ನು ಕಿತ್ತೆಸೆದು ಭಾರತದ ಧ್ವಜವನ್ನು ಹಾರಿಸಿದರೆ ರಾಜಸ್ಥಾನದ ಜೈಪುರದಲ್ಲಿ ಸ್ವಾತಂತ್ರ್ಯ ಹೋರಾಟಗಾರರ ಮೊಮ್ಮಗನೊಬ್ಬ ಪಾಕಿಸ್ತಾನದ ಧ್ವಜವನ್ನು ಹಾರಿಸುವುದರ ಮೂಲಕ ಪೊಲೀಸರ ಅತಿಥಿಯಾಗಿದ್ದಾನೆ. 

ಜೈಪುರದ ಮಾನಸ ಸರೋವರದ ಕಾವೇರಿ ಪಥ್ ಮಾರ್ಗದಲ್ಲಿ ಈ ಖಂಡನೀಯ ಘಟನೆ ನಡೆದಿದ್ದು, ಕಪಿಲ್ ಶಾಸ್ತ್ರಿ (35) ಎಂಬಾತ ತನ್ನ ಮನೆಯ ಮೇಲೆ ಪಾಕ್ ಧ್ವಜವನ್ನು ಹಾರಿಸಿದ್ದಾನೆ. ಪಾಕ್ ಸ್ವಾತಂತ್ರ್ಯೋತ್ಸವ ದಿನ ಆಗಸ್ಟ್ 14 ರಂದು ಆತ ಈ ಕೃತ್ಯವನ್ನೆಸಗಿದ್ದಾನೆ.

ಸ್ಥಳೀಯರು ನೀಡಿದ ದೂರಿನ ಮೇರೆಗೆ ಪೊಲೀಸರು ಆತನನ್ನು ಬಂಧಿಸಿ ವಿಚಾರಣೆಗೊಳಪಡಿಸಿ ಬಿಡುಗಡೆ ಮಾಡಿದ್ದಾರೆ. ಆರೋಪಿಯ ವಿರುದ್ಧ ಐಪಿಸಿ ವಿಭಾಗ 153 ಎ ( ಧರ್ಮ, ಜನಾಂಗ, ನಿವಾಸದ ಆಧಾರದ ಮತ್ತು ವಿವಿಧ ಗುಂಪುಗಳ ನಡುವೆ ದ್ವೇಷವನ್ನು ಪ್ರಚುರ ಪಡಿಸುವುದು) ಮತ್ತು ಐಪಿಸಿ 295 ( ಯಾವುದೇ ವರ್ಗದ ಧರ್ಮದ ಅಪಮಾನ)  ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ. ಆದರೆ ಆತ ಮಾನಸಿಕ ಅಸ್ವಸ್ಥನಾಗಿದ್ದು ಕೆಲ ವರ್ಷಗಳ ಹಿಂದೆ ಸ್ಲಂವೊಂದರಲ್ಲಿ ಹಾದು ಹೋಗುತ್ತಿದ್ದಾಗ ಅಲ್ಲಿ ಬಿದ್ದಿದ್ದ ಪಾಕ್ ಧ್ವಜವನ್ನು ಎತ್ತಿ ತಂದು ಮನೆಯಲ್ಲಿಟ್ಟಿದ್ದ ಎಂದು ಹೇಳಲಾಗುತ್ತಿದೆ. 

ಆತನ ಅಜ್ಜ ಬಾಬಾ ಹರಿಶ್ಚಂದ್ರ ಶಾಸ್ತ್ರಿ ಸ್ವಾತಂತ್ರ್ಯ ಸಂಗ್ರಾಮದಲ್ಲಿ ಹೋರಾಡಿದ್ದು ಅವರ ನೆನಪಿಗಾಗಿ ಜೈಪುರದ ಚಂದ್ರಪೋಲ್‌ನ ರಸ್ತೆಯೊಂದಕ್ಕೆ ಬಾಬಾ ಹರಿಶ್ಚಂದ್ರ  ಮಾರ್ಗವೆಂದು ಹೆಸರಿಡಲಾಗಿದೆ.

ತಾಜಾ ಸುದ್ದಿಗಳನ್ನು ಓದಲು ಮೊಬೈಲ್ ಆಪ್ ಡೌನ್‍ಲೋಡ್ ಮಾಡಿಕೊಳ್ಳಿ .