ಅಗ್ನಿ ದುರಂತ: ಮೂರು ತಿಂಗಳ ಮಗು ಸೇರಿ 8 ಮಂದಿ ಸಜೀವ ದಹನ

ಮೆಡಿಕಲ್ ಶಾಪ್‌ನಲ್ಲಿ ಭೀಕರ ಅಗ್ನಿ ಆಕಸ್ಮಿಕ ನಡೆದು ಮೂರು ತಿಂಗಳ ಮಗು ಸೇರಿದಂತೆ ಒಟ್ಟು 8 ಜನ ಸಜೀವ ದಹನವಾದ ಘಟನೆ ಮುಂಬೈನ ಅಂಧೇರಿ ಪ್ರದೇಶದ ಜುಹುಗಲ್ಲಿಯಲ್ಲಿರುವ ಮೆಡಿಕಲ್ ಶಾಪ್‌ವೊಂದರಲ್ಲಿ ನಡೆದಿದೆ. 3 ತಿಂಗಳ ಮಗು, ಐವರು ಮಕ್ಕಳು ಸೇರಿದಂತೆ ಘಟನೆಯಲ್ಲಿ 8 ಮಂದಿ ಸಾವನ್ನಪ್ಪಿದ್ದಾರೆ.

ಗುರುವಾರ ನಸುಕಿನ ಜಾವ 5.15ರ ಸುಮಾರಿಗೆ ಈ ಬೆಂಕಿ ಅವಘಡ ನಡೆದಿದ್ದು ತಡರಾತ್ರಿ ಮೆಡಿಕಲ್ ಶಾಪ್‌ವೊಂದರಲ್ಲಿ ವಿದ್ಯುತ್ ಶಾರ್ಟ್ ಸರ್ಕ್ಯೂಟ್ ಸಂಭವಿಸಿ ಹತ್ತಿದ ಬೆಂಕಿ ಕಟ್ಟಡದ ಮೊದಲನೇ ಮಹಡಿಗೂ ಹರಡಿ ನಿದ್ರೆಯಲ್ಲಿದವರೆಲ್ಲರೂ ಸಜೀವವಾಗಿ ಸುಟ್ಟು ಹೋಗಿದ್ದಾರೆ. 

ಘಟನೆಯಲ್ಲಿ ಮತ್ತೊಬ್ಬರಿಗೆ ಗಂಭೀರ ಗಾಯಗಳಾಗಿದ್ದು ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. 

ಮಾಹಿತಿ ಪಡೆದು ಸ್ಥಳಕ್ಕಾಗಮಿಸಿದ ಅಗ್ನಿಶಾಮಕ ತಂಡ ಬೆಂಕಿಯನ್ನು ನಂದಿಸುವ ಕೆಲಸದಲ್ಲಿ ಮಗ್ನರಾಗಿದ್ದಾರೆ. 

ಮೆಡಿಕಲ್ ಸ್ಟೋರ್ ನೆಲ ಮಹಡಿಯಲ್ಲಿದ್ದು, ಮೊದಲ ಮತ್ತು ಎರಡನೆಯ ಮಹಡಿಯಲ್ಲಿ ಕುಟುಂಬಗಳು ವಾಸವಾಗಿದ್ದವು. 

ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.