ಉತ್ತರ ಪ್ರದೇಶದ ಬುಂದೇಲ್ಖಂಡ್ದ ಮಝಗವಾ ಠಾಣಾ ಕ್ಷೇತ್ರದ ಜರಾಖರ್ ಗ್ರಾಮದಲ್ಲಿ ಮಹಿಳೆಯೊಬ್ಬಳನ್ನು ಹರಾಜಿನಲ್ಲಿ ಮಾರಾಟ ಮಾಡಿದ ಹೇಯ ಘಟನೆ ವರದಿಯಾಗಿದೆ.
ಗ್ರಾಮದ ದಲಿತ ಕೇರಿಯ ಯುವಕ ಶ್ಯಾಮಲಾಲ್ ಕೆಲ ದಿನಗಳ ಹಿಂದೆ ಓರಿಸ್ಸಾದಿಂದ ಮಹಿಳೆಯನ್ನು ಖರೀದಿಸಿ ಗ್ರಾಮಕ್ಕೆ ಕರೆದುಕೊಂಡು ಬಂದಿದ್ದ.. ಗ್ರಾಮಕ್ಕೆ ಬಂದು ಮಹಿಳೆಯನ್ನು ಮತ್ತೆ ಮಾರಾಟ ಮಾಡುವ ಪ್ರಯತ್ನ ಮಾಡಿದಾಗ ಮಹಿಳೆಯನ್ನು ಖರೀದಿಸಲು ಕೆಲವರು ಮುಂದೆ ಬಂದಿದ್ದಾರೆ. ಆಗ ಸಾರ್ವಜನಿಕ ಸ್ಥಳದಲ್ಲಿ ಮಹಿಳೆಯನ್ನು ಹರಾಜು ಮಾಡುವ ನಿರ್ಧಾರಕ್ಕೆ ಬಂದಿದ್ದಾನೆ.
ಗ್ರಾಮದಲ್ಲಿರುವ ಕಲ್ಯಾಣ ಮಂಟಪದಲ್ಲಿ ಸುಮಾರು 50 ಜನರು ಜಮಾಯಿಸಿದ್ದಾರೆ. ಇವರ ಮಧ್ಯದಲ್ಲಿ ಮಹಿಳೆಯನ್ನು ನಿಲ್ಲಿಸಿ ಹರಾಜು ಕೂಗಲಾಗಿದೆ. ಹರಾಜು ಕೂಗಿದ ಮೂರು ಜನರಲ್ಲಿ ಇಬ್ಬರ ವಯಸ್ಸು ಹೆಚ್ಚಾಗಿದ್ದರಿಂದ ಮಹಿಳೆ ಅವರ ಜೊತೆ ಹೋಗಲು ನಿರಾಕರಿಸಿದ್ದಾಳೆ. ಮೂರನೆ ವ್ಯಕ್ತಿ ಹರಾಜಿನಲ್ಲಿ ಗರಿಷ್ಠ 25 ಸಾವಿರ ರೂಪಾಯಿಗಳನ್ನು ನೀಡಿ ಮಹಿಳೆಯನ್ನು ಕರೆದುಕೊಂಡು ಹೋಗಿದ್ದಾನೆ. ಮಹಿಳೆಯ ಹರಾಜಿನ ಘಟನೆ ಕುರಿತಂತೆ ಪೋಲಿಸರು ತನಿಖೆ ನಡೆಸುತ್ತಿದ್ದಾರೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.