ನವದೆಹಲಿ: ಎಐಎಂಐಎಂ ಅಧ್ಯಕ್ಷ ಅಸಾದುದ್ದೀನ್ ಓವೈಸಿ ಅವರು ಮಂಗಳವಾರ ಲೋಕಸಭೆಯಲ್ಲಿ ಸಂಸದರಾಗಿ 'ಜೈ ಪ್ಯಾಲೆಸ್ತೀನ್' ಘೋಷಣೆಯೊಂದಿಗೆ ಪ್ರಮಾಣ ವಚನ ಸ್ವೀಕರಿಸಿ ವಿವಾದ ಸೃಷ್ಟಿಸಿದರು. ಇದೀಗ ಓವೈಸಿಯ ಈ ನಡೆ ಸಂಸತ್ತಿನಿಂದ ಅನರ್ಹತೆಗೆ ಕಾರಣವಾಗುವ ಸಾಧ್ಯತೆ ಹೆಚ್ಚಿದ ಎಂದು ಬಿಜೆಪಿ ನಾಯಕರು ಹೇಳಿದ್ದಾರೆ.
ತೆಲಂಗಾಣ ಮತ್ತು ಬಿಆರ್ ಅಂಬೇಡ್ಕರ್ ಅವರನ್ನು ಶ್ಲಾಘಿಸುವುದರ ಜೊತೆಗೆ, ಐದನೇ ಬಾರಿಗೆ ಹೈದರಾಬಾದ್ ಸ್ಥಾನದಿಂದ ಆಯ್ಕೆಯಾದ ಓವೈಸಿ ಉರ್ದುವಿನಲ್ಲಿ ಪ್ರಮಾಣ ವಚನ ಸ್ವೀಕರಿಸಿದ ನಂತರ 'ಜೈ ಪ್ಯಾಲೆಸ್ತೀನ್' (ಪಲೆಸ್ತೀನ್ ಜಯಿಸಿ) ಎಂಬ ಘೋಷಣೆಯನ್ನು ಎತ್ತಿದ್ದು ವಿವಾದವನ್ನು ಹುಟ್ಟುಹಾಕಿತು.
ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಅವರು ಓವೈಸಿ ಅವರ ಪ್ಯಾಲೆಸ್ತೀನ್ ಘೋಷಣೆ ಕೂಗಿರುವುದರ ಬಗ್ಗೆ ಕೆಲ ಸದಸ್ಯರಿಂದ ದೂರುಗಳು ಬಂದಿವೆ ಎಂದಿದ್ದಾರೆ.
"ನಮಗೆ ಪ್ಯಾಲೆಸ್ತೀನ್ ಅಥವಾ ಇನ್ನಾವುದೇ ದೇಶದೊಂದಿಗೆ ಯಾವುದೇ ದ್ವೇಷವಿಲ್ಲ. ಒಂದೇ ಸಮಸ್ಯೆಯೆಂದರೆ, ಪ್ರಮಾಣ ವಚನ ಸ್ವೀಕರಿಸುವಾಗ, ಯಾವುದೇ ಸದಸ್ಯರು ಬೇರೆ ದೇಶವನ್ನು ಹೊಗಳುವ ಘೋಷಣೆಯನ್ನು ಎತ್ತುವುದು ಸರಿಯೇ? ನಾವು ನಿಯಮಗಳನ್ನು ಪರಿಶೀಲಿಸಬೇಕಾಗಿದೆ" ಎಂದು ಅವರು ಹೇಳಿದರು.
ಬಿಜೆಪಿ ಐಟಿ ಸೆಲ್ ಮುಖ್ಯಸ್ಥ ಅಮಿತ್ ಮಾಳವಿಯಾ ಅವರು ಎಕ್ಸ್‌ನಲ್ಲಿ ಬರೆದುಕೊಂಡು, ಸಂವಿಧಾನದ 102 ನೇ ವಿಧಿಯ ತುಣುಕನ್ನು ಮತ್ತು ಓವೈಸಿ ಅವರ ಘೋಷಣೆಯ ವೀಡಿಯೊ ತುಣುಕನ್ನು ಪೋಸ್ಟ್ ಮಾಡಿದ್ದಾರೆ. "ಅಸ್ತಿತ್ವದಲ್ಲಿರುವ ನಿಯಮಗಳ ಪ್ರಕಾರ, ಅಸಾದುದ್ದೀನ್ ಓವೈಸಿ ಅವರು ವಿದೇಶಿ ರಾಜ್ಯ, ಅಂದರೆ ಪ್ಯಾಲೆಸ್ತೀನ್‌ಗೆ ಬದ್ಧತೆಯನ್ನು ಪ್ರದರ್ಶಿಸಿದ್ದಕ್ಕಾಗಿ ಅವರ ಲೋಕಸಭಾ ಸದಸ್ಯತ್ವದಿಂದ ಅನರ್ಹಗೊಳಿಸಬಹುದು" ಎಂದು ಮಾಳವಿಯಾ ಹೇಳಿದರು.<>