ಲಕ್ಷ ಲಕ್ಷ ಕೋಟಿ ಗಟ್ಟಲೆ ಮೌಲ್ಯದ ಚಿನ್ನದ ಸಂಗ್ರಹವಿರುವ ಶ್ರೀ ಪದ್ಮನಾಭಸ್ವಾಮಿ ಮಂದಿರದಲ್ಲಿ ಆವರಣದಲ್ಲಿರುವ ಶ್ರೀಪಾದಂ ಕುಂಡದಲ್ಲಿ ಪೈಪ್ ಬಾಂಬ್‌ಗಳು ಪತ್ತೆಯಾಗಿ ಆಘಾತ ಮೂಡಿಸಿದ್ದಲ್ಲದೇ ದೇವಾಲಯದ ಭದ್ರತೆಯ ಬಗ್ಗೆ ಹಲವು ಅನುಮಾನಗಳಿಗೆ ಕಾರಣವಾಗಿದೆ.
ದೇವಾಲಯದ ಭದ್ರತಾ ಸಿಬ್ಬಂದಿಗಳು ಪೈಪ್-ಬಾಂಬ್‌ಗಳನ್ನು ಸುರಕ್ಷಿತ ಸ್ಥಳಕ್ಕೆ ತೆಗೆದುಕೊಂಡು ಹೋಗಿ ನಿಷ್ಟ್ರೀಯಗೊಳಿಸಿದ್ದಾರೆ. ಪೈಪ್-ಬಾಂಬ್‌ಗಳು ಸುಮಾರು 15 ವರ್ಷಗಳಷ್ಟು ಹಳೆಯದಾಗಿವೆ ಎನ್ನಲಾಗಿದೆ.
ಜಿಲ್ಲಾಧಿಕಾರಿ ಮತ್ತು ದೇವಾಲಯದ ಮುಖ್ಯ ಭದ್ರತಾ ಅಧಿಕಾರಿಯಾದ ಜೆ.ಸುಕುಮಾರ್ ಪಿಳ್ಳೈ ಮಾತನಾಡಿ, ಶ್ರೀ ಪದ್ಮನಾಭಸ್ವಾಮಿ ಮಂದಿರದಲ್ಲಿ ಆವರಣದಲ್ಲಿರುವ ಶ್ರೀಪಾದಂ ಕುಂಡವನ್ನು ಸ್ವಚ್ಚಗೊಳಿಸುತ್ತಿರುವಾಗ ಕಬ್ಬಿಣದಿಂದ ತಯಾರಿಸಲಾದ ಐದು ಪೈಪ್-ಬಾಂಬ್‌ಗಳು ಪತ್ತೆಯಾಗಿದ್ದು, ಬಾಂಬ್‌ಗಳು 40 ಸೆಂಟಿಮೀಟರ್ ಉದ್ದ ಮತ್ತು 5 ಸೆಂಟಿಮೀಟರ್ ಸುತ್ತಳತೆಯನ್ನು ಹೊಂದಿವೆ. ಬಾಂಬ್‌ಗಳನ್ನು ಗನ್ನಿ ಬ್ಯಾಗ್‌ನಲ್ಲಿ ಇಡಲಾಗಿತ್ತು ಎಂದು ತಿಳಿಸಿದ್ದಾರೆ.
ಶ್ರೀಪಾದಂ ಅರಮನೆಯನ್ನು ಹೆರಿಟೇಜ್ ಮ್ಯೂಸಿಯಂ ಆಗಿ ಪರಿವರ್ತಿಸಲು ಶ್ರೀಪಾದಂ ಕುಂಡುವನ್ನು ಸ್ವಚ್ಚಗೊಳಿಸುವ ಹೊಣೆಯ ಮೇಲ್ವಿಚಾರಣೆಯನ್ನು ಆರ್ಕಿಯಾಲಾಜಿ ವಿಭಾಗದ ಗುಮಾಸ್ತನಿಗೆ ವಹಿಸಲಾಗಿತ್ತು. ಕುಂಡುವನ್ನು ಸ್ವಚ್ಚಗೊಳಿಸುವಾಗ ಪೈಪ್-ಬಾಂಬ್‌ಗಳು ಪತ್ತೆಯಾಗಿರುವುದು ಕಂಡು ಪೊಲೀಸರಿಗೆ ಮಾಹಿತಿ ನೀಡಿದ್ದಾನೆ. ತಕ್ಷಣವೇ ಭದ್ರತಾ ದಳದ ಸಿಬ್ಬಂದಿ ಬಾಂಬ್‌ಗಳನ್ನು ನಿಷ್ಕ್ರೀಯಗೊಳಿಸಿದ್ದಾರೆ.
ಪೈಪ್-ಬಾಂಬ್‌ಗಳು ಪತ್ತೆಯಾಗಿದ್ದರಿಂದ ಬಾಂಬ್ ನಿಷ್ಟ್ರೀಯ ದಳಕ್ಕೆ ಮಾಹಿತಿ ನೀಡಲಾಯಿತು. ಬಾಂಬ್ ನಿಷ್ಟ್ರೀಯ ದಳದ ತಂಡ ಬಾಂಬ್‌ಗಳನ್ನು ಸುರಕ್ಷಿತ ಸ್ಥಳಕ್ಕೆ ತೆಗೆದುಕೊಂಡು ಹೋಗಿ ನಿಷ್ಟ್ರೀಯಗೊಳಿಸಿದ್ದಾರೆ ಎಂದು ಜಿಲ್ಲಾಧಿಕಾರಿ ಸುಕುಮಾರಾ ಪಿಳ್ಳೈ ತಿಳಿಸಿದ್ದಾರೆ.