ಮಹಾಭಾರತದಲ್ಲಿ ಯುಧಿಷ್ಠರ ಪತ್ನಿ ದ್ರೌಪದಿಯನ್ನು ಪಣಕ್ಕಿಟ್ಟು ಸೋತಂತೆ ಪತಿ ಮಹಾಶಯನೊಬ್ಬ ಪತ್ನಿಯನ್ನು ಐಪಿಎಲ್ ಬೆಟ್ಟಿಂಗ್‌ಗೆ ಒಡ್ಡಿ ಸೋತ ಘಟನೆ ವರದಿಯಾಗಿದೆ.
ಕಾನ್ಪುರ್ ಜಿಲ್ಲೆಯ ಗೋವಿಂದನಗರ್ ನಿವಾಸಿಯಾಗಿರುವ ರವೀಂದ್ರ ಸಿಂಗ್ ಎನ್ನು ವ್ಯಕ್ತಿಯೊಬ್ಬ ತನ್ನ ಪತ್ನಿಯನ್ನು ಪಣಕ್ಕಿಟ್ಟು ಸೋತಿದ್ದಾನೆ.
ರವೀಂದ್ರ ಸಿಂಗ್ ವಿರುದ್ಧ ಐಪಿಎಲ್ ಬೆಟ್ಟಿಂಗ್‌ನಲ್ಲಿ ಗೆದ್ದವರು ಪತ್ನಿ ಜಸ್ಮಿತ್ ಕೌರ್‌ಗೆ ಕಿರುಕುಳ ನೀಡಲು ಆರಂಭಿಸಿದ್ದಾರೆ. ಇದರಿಂದ ಬೇಸತ್ತ ಕೌರ್ ಸಾಮಾಜಿಕ ಸಂಘಟನೆಗಳ ಕಾರ್ಯಕರ್ತರ ಬೆಂಬಲ ಪಡೆದು ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾಳೆ.
ಪೊಲೀಸರು ಪತಿ ರವೀಂದ್ರ ಸಿಂಗ್ ಮತ್ತು ಆತನ ಇತರ ಸಹಚರರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ಆರೋಪಿಗಳ ಪತ್ತೆಯಲ್ಲಿ ತೊಡಗಿದ್ದಾರೆ. ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗುತ್ತಿದ್ದಂತೆ ಆರೋಪಿಗಳು ಪರಾರಿಯಾಗಿದ್ದಾರೆ.
ಪೊಲೀಸ್ ಮೂಲಗಳ ಪ್ರಕಾರ, ಆರೋಪಿ ರವೀಂದ್ರ ಸಿಂಗ್ ತನ್ನೆಲ್ಲಾ ಹಣವನ್ನು ಶೇರುಮಾರುಕಟ್ಟೆಯಲ್ಲಿ ಕಳೆದುಕೊಂಡ ನಂತರ, ಐಪಿಎಲ್ ಬೆಟ್ಟಿಂಗ್‌ನಿಂದ ಹಣ ಸಂಪಾದಿಸಲು ಪತ್ನಿಯನ್ನೇ ಅಡವಿಟ್ಟಿದ್ದಾನೆ. ಅದರಲ್ಲೂ ಕೂಡಾ ಸೋತಿದ್ದಾನೆ.
ಐದು ವರ್ಷಗಳ ಹಿಂದೆ ವಿವಾಹವಾದ ದಂಪತಿಗಳ ಮಧ್ಯೆ ಸಾಮರಸ್ಯದ ಕೊರತೆ ಎದುರಾಗಿತ್ತು. ವಿವಾಹವಾದ ಮಾರನೇ ದಿನದಿಂದಲೇ ಪತಿಯ ಕಾಟ ಆರಂಭವಾಗಿತ್ತು. ವಿವಾಹ ಸಂದರ್ಭದಲ್ಲಿ ನನಗೆ ಬಂದಿದ್ದ ಎಲ್ಲಾ ಉಡುಗೊರೆಗಳನ್ನು ಶೇರುವಹಿವಾಟಿನಲ್ಲಿ ಕಳೆದುಕೊಂಡಿದ್ದ ಎಂದು ಬ್ಯೂಟಿ ಪಾರ್ಲರ್ ಒಡತಿಯಾದ ಜಸ್ಮಿತ್ ಕೌರ್ ತಿಳಿಸಿದ್ದಾರೆ.
ಮದ್ಯ ಸೇವನೆ, ಜೂಜಾಟ ಸೇರಿದಂತೆ ಹಲವಾರು ದುಶ್ಚಟಗಳಿಂದಾಗಿ ಮನೆಯಲ್ಲಿದ್ದ ಹಣ, ಒಡುವೆ, ಆಸ್ತಿ, ಪಾಸ್ತಿ ಎಲ್ಲವನ್ನು ಕಳೆದುಕೊಂಡಿದ್ದ ಎಂದು ಆರೋಪಿಸಿದ್ದಾಳೆ.
ಐಪಿಎಲ್‌ನಲ್ಲಿ ಬೆಟ್ಟಿಂಗ್ ಆಡಲು ವಾಸವಾಗಿದ್ದ ಮನೆಯನ್ನೇ ಮಾರಾಟ ಮಾಡುವ ಯೋಚನೆಯಲ್ಲಿದ್ದಾಗ ಈ ಘಟನೆ ನಡೆದಿದೆ ಎಂದು ಆರೋಪಿ ರವೀಂದ್ರ ಸಿಂಗ್ ಪತ್ನಿ ಜಸ್ಮಿತ್ ಕೌರ್ ತಿಳಿಸಿದ್ದಾಳೆ.
ವೆಬ್‌ದುನಿಯಾ ಮೊಬೈಲ್ ಆಪ್ (ಡೌನ್‌ಲೋಡ್) ಮಾಡಿಕೊಂಡು ತಾಜಾ ಸುದ್ದಿಗಳನ್ನು ಪಡೆಯಿರಿ.