ಅತ್ಯಾಚಾರ ಪೀಡಿತೆಗೆ ಶಾಲೆ ಬಿಡಿಸಿದ ಪಂಚಾಯತ್

ಉತ್ತರಪ್ರದೇಶದ ಇಟಾಹ್‌ದಲ್ಲಿನ ಪಂಚಾಯತ್ ಒಂದು ವಿಲಕ್ಷಣ ಫರ್ಮಾನು ಹೊರಡಿಸಿದೆ. ಅತ್ಯಾಚಾರ ಪೀಡಿತೆಗೆ ನ್ಯಾಯ ನೀಡುವುದರ ಬದಲು ಆಕೆಗೆ ಶಾಲೆಯನ್ನು ಬಿಡುವಂತೆ ಫರ್ಮಾನು ಹೊರಡಿಸಿದೆ. 

ಬಾಲಕಿ ಓದುತ್ತಿದ್ದ ಶಾಲೆಯ ವ್ಯವಸ್ಥಾಪಕನೇ ಆಕೆಯ ಮೇಲೆ ಅತ್ಯಾಚಾರವೆಸಗಿ, ಘಟನೆಯನ್ನು ಚಿತ್ರೀಕರಿಸಿದ್ದ. ಆತ ವಿಡಿಯೋವನ್ನು ಎಮ್ಎಮ್ಎಸ್ ವಿಡಿಯೋ ಮಾಡಿ ಹರಿಯ ಬಿಡಬಹುದೆಂಬ ಭಯದಿಂದ ಬಾಲಕಿ ಯಾರಿಗೂ ಈ ವಿಷಯವನ್ನು ತಿಳಿಸಿರಲಿಲ್ಲ. 

ಆದರೆ ವಿಡಿಯೋ ಎಮ್ಎಮ್ಎಸ್ ಆಗಿ ಹರಿದಾಡುತ್ತಿದ್ದಂತೆ ಪ್ರಕರಣ ಬೆಳಕಿಗೆ ಬಂದಿದೆ. ಗ್ರಾಮದ ಪಂಚಾಯತ್ ಈ ಕುರಿತು ವಿಚಾರಣೆ ನಡೆಸಿ ಬಾಲಕಿಗೆ ಶಾಲೆಯನ್ನು ಬಿಟ್ಟು ಬಿಡುವಂತೆ ಆದೇಶ ಹೊರಡಿಸಿದೆ. 

ಕೋಟ್ವಾಲಿ ಪೊಲೀಸ್ ಠಾಣೆಯಲ್ಲಿ ಬಾಲಕಿ ಪೋಷಕರು ಪ್ರಕರಣ ದಾಖಲಿಸಿದ್ದು ಆರೋಪಿಯನ್ನು ಬಂಧಿಸಲಾಗಿದೆ. ಶಾಲೆಯ ವ್ಯವಸ್ಥಾಪಕ ಹಲವು ವಿದ್ಯಾರ್ಥಿಗಳ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾನೆ. ನಪಾಸು ಮಾಡುವುದಾಗಿ ಬೆದರಿಸಿ ಆತ ಅತ್ಯಾಚಾರವೆಸಗುತ್ತಿದ್ದ ಎಂದು ಪೀಡಿತೆ ದೂರಿನಲ್ಲಿ ತಿಳಿಸಿದ್ದಾಳೆ.