ಮೂವರು ಪತ್ನಿಯರಿಗೆ ತಲಾಕ್ ನೀಡಿ 4ನೇ ಮದುವೆಗೆ ಸಿದ್ಧವಾಗಿದ್ದವನಿಗೆ ತಡೆಗೋಡೆಯಾಗಿ ನಿಂತ ಮಾಜಿ ಪತ್ನಿಯರು..!

ಮೂವರು ಪತ್ನಿಯರಿಗೆ ತಲಾಕ್ ನೀಡಿ 4ನೇ ಮದುವೆಗೆ ಸಿದ್ಧನಾಗಿದ್ದವನನ್ನ ಆತನ ಪತ್ನಿಯರೇ ತಡೆಯಲು ಮುಂದಾಗಿರುವ ಘಟನೆ ಉತ್ತರಪ್ರದೇಶದ ಬಹ್ರೇಚ್ ಜಿಲ್ಲೆಯಲ್ಲಿ ಬೆಳಕಿಗೆ ಬಂದಿದೆ.

ಮದುವೆಯಾದ ಬಳಿಕ ಪತ್ನಿಯರ ಸೆಕ್ಸ್ ವಿಡಿಯೋ ಮಾಡುತ್ತಿದ್ದ ಈತ ಬಳಿಕ ಆ ವಿಡಿಯೋ ತೋರಿಸಿ ಬ್ಲಾಕ್ ಮೇಲ್ ಮಾಡುತ್ತಿದ್ದ. ಹಣ ಕೊಡದಿದ್ದರೆ ಬಹಿರಂಗಪಡಿಸುವುದಾಗಿ ಹೆದರಿಸುತ್ತಿದ್ದ. ಹಣ ಸುಲಿಗೆ ಮಾಡಿ ಬಳಿಕ ಹೆದರಿಸಿ ತಲಾಕ್ ನೀಡುತ್ತಿದ್ದ ಎಂದು ತಿಳಿದುಬಂದಿದೆ.

ಮಾಜಿ ಪತಿ ಡ್ಯಾನಿಶ್ ವಿರುದ್ಧ ಸಿಡಿದೆದ್ದಿರುವ ಮೂವರೂ ಮಾಜಿ ಪತ್ನಿಯರು ಈ ಸಂಬಂಧ ಹೆಚ್ಚುವರಿ ಎಎಸ್`ಪಿ ದಿನೇಶ್ ತ್ರಿಪಾಠಿಯನ್ನ ಭೇಟಿ ಮಾಡಿ  ಆತನ ಹೀನ ಕೃತ್ಯವನ್ನ ಬಿಚ್ಚಿಟ್ಟಿದ್ದಾರೆ.  

2013ರಲ್ಲಿ ಮೊದಲ ಮದುವೆಯಾಗಿದ್ದ 30 ವರ್ಷದ ಡ್ಯಾನಿಶ್, ಪತ್ನಿಯ ಅಶ್ಲೀಲ ಎಂಎಂಎಸ್ ಮಾಡಿದ್ದ. ಹಣ ಕೊಡು ಇಲ್ಲದಿದ್ದರೆ ಎಂಎಂಎಸ್ ರಿಲೀಸ್ ಮಾಡುವುದಾಗಿ ಪತ್ನಿಯನ್ನೇ ಪೀಡಿಸಿದ್ದ. ಬಳಿಕ ತ್ರಿವಳಿ ನೀಡಿ 2ನೇ ವಿವಾಹವಾಗಿದ್ದ. ಒಂದೇ ವರ್ಷದಲ್ಲಿ 2ನೇ ಹೆಂಡತಿಗೂ ಈತ ಕೈಕೊಟ್ಟಿದ್ದ

ಅಕ್ಟೋಬರ್ 24, 2016ರಲ್ಲಿ ಸಂಬಂಧಿಕರ ಮನೆಗೆ ಹೋಗಿದ್ದ ಕೀಚಕ ಡ್ಯಾನಿಶ್, 15 ವರ್ಷದ ಯುವತಿ ಮೇಲೆ ಅತ್ಯಾಚಾರ ಮಾಡಿ ಬಳಿಕ ಮದುವೆಯಾಗಿದ್ದ. ಯುವತಿಯ ಎಂಎಂಎಸ್ ಮಾಡಿ ತನ್ನ ವಿರುದ್ಧ ಮಾತನಾಡಿದರೆ ಬಹಿರಂಗಪಡಿಸುವುದಾಗಿ ಯುವತಿಯ ಪೋಷಕರನ್ನ ಬೆದರಿಸಿದ್ದ.

ಈ ಮಧ್ಯೆ, ಡ್ಯಾನಿಶ್ 4ನೇ ಮದುವೆಗೂ ಸಿದ್ಧನಾಗಿದ್ದಾನೆಂಬುದನ್ನ ಅರಿತ ಮೂವರೂ ಮಾಜಿ ಪತ್ನಿಯರು ಪೊಲೀಸರ ಮೊರೆ ಹೋಗಿದ್ದಾರೆ. ಪೋಕ್ಸೋ ಕಾಯ್ದೆಯಡಿ ಕೇಸ್ ದಾಖಲಾಗಿದ್ದು, ವಿಚಾರಣೆ ನಡೆಯುತ್ತಿದೆ.