ಬಾಲಿವುಡ್ ಮೆಗಾಸ್ಟಾರ್ ಅಮಿತಾಬ್ ಬಚ್ಚನ್ ನಿರೂಪಣೆಯ ಕೌನ್ ಬನೇಗಾ ಕ್ರೋರ್‌ಪತಿ ರಿಯಾಲಿಟಿ ಗೇಮ್ ಶೋನಲ್ಲಿ ಅತ್ಯಧಿಕ ಬಹುಮಾನದ ಮೊತ್ತವಾದ 7 ಕೋಟಿ ರೂ.ಗಳನ್ನು ನರುಲಾ ಸಹೋದರರಾದ ಅಚಿನ್ ಮತ್ತು ಸಾರ್ಥಕ್ ಗೆದ್ದ ಪ್ರಪ್ರಥಮ ಸ್ಪರ್ಧಿಗಳು ಎಂಬ ಗೌರವಕ್ಕೆ ಪಾತ್ರರಾಗಿದ್ದಾರೆ.
ದೆಹಲಿ ಮೂಲದ ನರುಲಾ ಸಹೋದರರು ನಾಲ್ಕು ಲೈಫ್‌ಲೈನ್‌ಗಳ ನೆರವಿನಿಂದ ಎಲ್ಲಾ 14 ಪ್ರಶ್ನೆಗಳಿಗೂ ಉತ್ತರಿಸಿ ವಿಜೇತರಾಗಿ ಹೊಮ್ಮಿದರು. ಅಚಿನ್ ಮಾರ್ಕೆಟಿಂಗ್ ಮ್ಯಾನೇಜರ್ ಆಗಿದ್ದು ಸಾರ್ಥಕ್ ವಿದ್ಯಾರ್ಥಿಯಾಗಿದ್ದಾನೆ. ಕಳೆದ 10 ವರ್ಷಗಳಿಂದ ಈ ಶೋನಲ್ಲಿ ಭಾಗವಹಿಸಲು ಅಚಿನ್ ಪ್ರಯತ್ನಿಸುತ್ತಿದ್ದು, ಫಾಸ್ಟೆಸ್ಟ್ ಫಿಂಗರ್ ಫಸ್ಟ್ ಸ್ಪರ್ಧೆಯಲ್ಲಿ ಆಯ್ಕೆಯಾಗುತ್ತಿರಲಿಲ್ಲ. ಸಹೋದರರು ಅತ್ಯಂತ ಗೊಡ್ಡ ಬಹುಮಾನ ವಿಜೇತರಾದ ಕೂಡಲೇ ಕಳೆದ 14 ವರ್ಷಗಳಿಂದ ಶೋ ಪ್ರಾಯೋಜಿಸಿದ ಬಚ್ಚನ್ ಮಂತ್ರಮುಗ್ಧರಾದರು.
ಶೋ ನಿರ್ಮಾಪಕ ಸಿದ್ಧಾರ್ಥ ಬಸು ಜಾಕ್‌ಪಾಟ್ ಗೆಲುವು ಮರೆಯಲಾಗದ ಕ್ಷಣ ಎಂದು ಹರ್ಷಿಸಿದರು. ಈ ಕ್ಷಣಕ್ಕಾಗಿ ನಾವು ಕಾಯುತ್ತಿದ್ದೆವು. ಅಚಿನ್ ಮತ್ತು ಸಾರ್ಥಕ್‌ರಂಥ ಚುರುಕಾದ ವ್ಯಕ್ತಿಗಳು ಮಹಾ ಜಾಕ್‌ಪಾಟ್‌ನಲ್ಲಿ ಗೆದ್ದಿರುವುದು ಸಂತೋಷ ತಂದಿದೆ ಎಂದು ಹೇಳಿದ್ದಾರೆ.
