ಆಪ್ ಶಾಸಕ ಅಂದರ್

ತನ್ನ ಸಂಬಂಧಿ ಮಹಿಳೆಗೆ ಲೈಂಗಿಕ ಕಿರುಕುಳ ನೀಡಿದ ಆರೋಪವನ್ನೆದುರಿಸುತ್ತಿದ್ದ ಆಪ್ ಶಾಸಕ ಅಮಾನತುಲ್ಲಾ ಖಾನ್‌ನನ್ನು ದೆಹಲಿ ಪೊಲೀಸರು ಬುಧವಾರ ಬಂಧಿಸಿದ್ದಾರೆ.

ವಿಚಾರಣೆಗೆಂದು ಆಗಮಿಸಿದ್ದ ಖಾನ್ ಅವರನ್ನು ವಶಕ್ಕೆ ಪಡೆದುಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. 

ಖಾನ್ ಸೋಮವಾರ ಜಾಮಿಯಾ ನಗರ ಪೊಲೀಸ್ ಠಾಣೆಗೆ ತೆರಳಿ ತನ್ನನ್ನು ಬಂಧಿಸುವಂತೆ ಹೇಳಿದ್ದರು. ಆದರೆ ಪೊಲೀಸರು ಅದಕ್ಕೆ ಅಸಮ್ಮತಿ ಸೂಚಿಸಿ ನಾವು ತನಿಖಾ ವರದಿಯನ್ನು ಅನುಸರಿಸಿ ಕ್ರಮ ಕೈಗೊಳ್ಳುತ್ತೇವೆ, ಎಂದು ಹೇಳಿದ್ದರು.

ಭಾನುವಾರ ಒತ್ತಡದ ಹಿನ್ನೆಲೆಯಲ್ಲಿ ಪೊಲೀಸರು ನನ್ನನ್ನು ಬಂಧಿಸ ಬಯಸಿದ್ದಾರೆ ಎಂದಿದ್ದ ಓಖ್ಲಾ ಶಾಸಕ ಸೋಮವಾರ ಜನರ ಒತ್ತಡದಿಂದಾಗಿ ಪೊಲೀಸರು ನನ್ನನ್ನು ಬಂಧಿಸುತ್ತಿಲ್ಲ ಎಂದಿದ್ದರು. 

ಖಾನ್ ಅತ್ತಿಗೆ ಎಂದು ಹೇಳುತ್ತಿರುವ ಮಹಿಳೆ ಕೆಲ ದಿನಗಳ ಹಿಂದೆ, ಅವರ ವಿರುದ್ಧ ಲೈಂಗಿಕ ದೌರ್ಜನ್ಯ ಪ್ರಕರಣವನ್ನು ದಾಖಲಿಸಿದ್ದಾಳೆ.

ಈ ಹಿಂದೆ ಕೂಡ ಬೇರೆ ಪ್ರಕರಣ ಒಂದಕ್ಕೆ ಸಂಬಂಧಿಸಿದಂತೆ ಬಂಧನಕ್ಕೊಳಗಾಗಿದ್ದ ಆಪ್ ಶಾಸಕ ಬಳಿಕ ಜಾಮೀನು ಪಡೆದು ಹೊರ ಬಂದಿದ್ದರು. 

ಅಧಿಕಾರಕ್ಕೇರಿದಾಗಿನಿಂದ ಆಪ್ ಶಾಸಕರು ಬಂಧನಕ್ಕೊಳಗಾದ 19ನೇ ಪ್ರಕರಣ ಇದಾಗಿದೆ. 

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ