ಅತ್ಯಾಚಾರಿಯಿಂದ ತಪ್ಪಿಸಿಕೊಳ್ಳಲು ಆ ಪುಟ್ಟ ಬಾಲಕಿ ಮಾಡಿದ್ದೇನು ಗೊತ್ತೇ?

ದೆಹಲಿಯ ಹೊರವಲಯದ ಕಿರಾರಿ ಪ್ರದೇಶದಲ್ಲಿ ಮನೆ ಹೊರಗಿನ ಮಂಚದ ಮೇಲೆ ಮಲಗಿದ್ದ ಬಾಲಕಿಯನ್ನು ಅಪಹರಿಸಿ ಅತ್ಯಾಚಾರವೆಸಗಿದ ಕೃತ್ಯದ ಬಗ್ಗೆ ನೀವು ಓದಿಯೇ ಇರುತ್ತೀರಿ. ಆಕೆಗಿನ್ನು 8 ವರ್ಷ. ಏನೂ ಅರಿಯದ ಪುಟ್ಟ ವಯಸ್ಸವಳದು. ಆದರೆ ಅತ್ಯಾಚಾರಿಯ ಕಪಿಮುಷ್ಠಿಯಿಂದ ತಪ್ಪಿಸಿಕೊಳ್ಳಲು ಆಕೆ ಮಾಡಿದ ಉಪಾಯ ಮಾತ್ರ ಎಲ್ಲರನ್ನು ದಂಗು ಬಡಿಸಿದೆ. 

ಆಕೆಯ ತಂದೆ ಘಟನೆಯನ್ನು ವಿವರಿಸುವುದು ಹೇಗೆ : ನನ್ನ ಮಗಳು ಮನೆಯ ಮುಂದೆ ಹಾಕಲಾಗಿದ್ದ ಮಂಚದ ಮೇಲೆ ಮಲಗಿದ್ದಳು. ರಾತ್ರಿ ಸುಮಾರು 1.30 ರ ಸುಮಾರಿಗೆ ಯುವಕನೊಬ್ಬ ಆಕೆಯನ್ನು ಎತ್ತಿಕೊಂಡು ಹೋದ. ತಾನು ಮನೆಯಲ್ಲಿಲ್ಲ. ಅಪರಿಚಿತ ಜತೆಗೆ ಎಲ್ಲೋ ಗೊತ್ತಿಲ್ಲದ ಸ್ಥಳದಲ್ಲಿದ್ದೇನೆ ಎಂದು ತಿಳಿದಾಗ ಆಕೆ ಕೂಗಿಕೊಳ್ಳಲು ಯತ್ನಿಸಿದ್ದಾಳೆ. ಆದರೆ ಆತ ಆಕೆಯ ಬಾಯಿಯನ್ನು ಒತ್ತಿ ಹಿಡಿದು ಅತ್ಯಾಚಾರವೆಸಗಿದ್ದಾನೆ. 

ಆತ ತನ್ನನ್ನು ಕೊಲ್ಲ ಬಹುದೆಂದು ಬೆದರಿದ ಬಾಲಕಿ ಉಸಿರು ಬಿಗಿ ಹಿಡಿದು ಸತ್ತಂತೆ ನಟಿಸಿದ್ದಾಳೆ.  ಚಿವುಟಿ ಪರೀಕ್ಷಿಸಿದ ಕಾಮುಕ ಆಕೆಯಿಂದ ಯಾವುದೇ ಸ್ಪಂದನೆ ಬರದಿದ್ದಾಗ ಸತ್ತಿದ್ದಾಳೆ ಎಂದು ಭಾವಿಸಿ ಭಯಪಟ್ಟು ಅಲ್ಲಿಂದ ಪರಾರಿಯಾಗಿದ್ದಾನೆ. 

ಆತ ಅಲ್ಲಿಂದ ಹೋದ ಬಳಿಕ ಬಾಲಕಿ ಎದ್ದು ಮನೆ ಕಡೆ ಓಡಲು ಪ್ರಾರಂಭಿಸಿದ್ದಾಳೆ. ಅದನ್ನು ಕಂಡ ಆರೋಪಿ ಸಹ ಆಕೆಯ ಬೆನ್ನು ಹತ್ತಿದ್ದಾನೆ. ಆದರೆ ಕಲ್ಲಿಗೆ ಮುಗ್ಗರಿಸಿ ಕೆಳಕ್ಕೆ ಬಿದ್ದಿದ್ದಾನೆ. ಹೀಗಾಗಿ ಬಾಲಕಿ ಆತನಿಂದ ತಪ್ಪಿಸಿಕೊಳ್ಳಲು ಯಶಸ್ವಿಯಾಗಿದ್ದಾಳೆ.

ಸದ್ಯ ಬಾಲಕಿಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದ್ದು ಆರೋಪಿಯನ್ನು ಮಂಗಳವಾರ ಬಂಧಿಸಲಾಗಿದೆ. 

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.