ಭೂಪಾಲ್: ವಧು ತನ್ನ ವಿವಾಹ ಸಮಾರಂಭದಲ್ಲಿ ಮಗುವಿಗೆ ಜನ್ಮನೀಡಿದಾಗ, ವಧು ಮತ್ತು ವರರ ಬಂಧುಗಳು ಮದುವೆಯನ್ನು ರದ್ದು ಮಾಡಿ ಗಂಟು ಮೂಟೆ ಕಟ್ಟಿದ್ದರು.ಆದರೆ ವರ ಮಾತ್ರ ಮದುವೆ ಸಮಾರಂಭ ಮುಂದುವರಿಸುವಂತೆ ಆದೇಶಿಸಿದ. ಅಷ್ಟೇ ಅಲ್ಲ ವಧು ಮತ್ತು ನವಸಂಜಾತ ಶಿಶುವನ್ನು ಮನೆಗೆ ಕರೆದುಕೊಂಡು ಹೋದ. ಬುಡಕಟ್ಟು ಪ್ರಾಬಲ್ಯದ ದಿಂಡೋರಿ ಜಿಲ್ಲೆಯಲ್ಲಿ ಈ ಘಟನೆ ನಡೆದಿದೆ. ವಧುವಿಗೆ ಮದುವೆ ಸಮಾರಂಭದಲ್ಲೇ ಹೆರಿಗೆ ನೋವು ಆರಂಭವಾಗಿ ಸ್ಥಳದಲ್ಲೇ ಮಗುವನ್ನು ಹೆತ್ತಳು. ಅಲ್ಲಿ ನೆರೆದಿದ್ದ ಅತಿಥಿಗಳಿಗೆ ಮತ್ತು ಬಂಧುಗಳಿಗೆ ಆಘಾತವಾಯಿತು. ವರ ಮಾನ್ ಸಿಂಗ್‌ನನ್ನು ವಿವಾಹವನ್ನು ಬಿಟ್ಟು ಬರುವಂತೆ ಒತ್ತಡ ಹೇರಿದರು.
ಆದರೆ ಪ್ರತಿಯೊಬ್ಬರು ಅಚ್ಚರಿಪಡುವಂತೆಇಂತಹ ಪರಿಸ್ಥಿತಿಯಲ್ಲಿ ಅವಳ ಕೈಬಿಡುವುದಿಲ್ಲ ಎಂದು ಹೇಳಿ ಮಗುವನ್ನು ಕೈಯಲ್ಲಿ ಹಿಡಿದೇ ವಿವಾಹದ ವಿಧಿಗಳನ್ನು ಮುಗಿಸಿದ. ನಾನು ಅವಳ ಜತೆ ನಿಶ್ಚಿತಾರ್ಥ ಮಾಡಿಕೊಂಡ ದಿನವೇ ಜೀವಮಾನಪೂರ್ತಿ ಅವಳನ್ನು ಸಾಕುವ ಭರವಸೆ ನೀಡಿದ್ದೆ ಎಂದು ಮಾನ್ ಸಿಂಗ್ ಹೇಳಿದ. ನಂತರ ಪಂಚಾಯಿತಿ ವಿಧಿಸಿದ ದಂಡವನ್ನು ವರ ಪಾವತಿ ಮಾಡಿದ.