ಭದ್ರತಾ ಪಡೆ- ನಕ್ಸಲರ ಮುಖಾಮುಖಿ: 10 ನಕ್ಸಲರ ಹತ್ಯೆ
ರಾಯಪುರ , ಬುಧವಾರ, 17 ಏಪ್ರಿಲ್ 2013 (10:03 IST)
ಛತ್ತೀಸ್‌ಗಢದ ಮಾವೋವಾದಿ ಪೀಡಿತ ಸುಕ್ಮ ಜಿಲ್ಲೆಯಲ್ಲಿ ಭದ್ರತಾ ಪಡೆಗಳೊಂದಿಗೆ ನಡೆದ ಗುಂಡಿನ ಚಕಮಕಿಯಲ್ಲಿ 10 ನಕ್ಸಲರು ಹತರಾಗಿದ್ದಾರೆ ಹಾಗೂ ಹಲವಾರು ಮಂದಿ ಗಾಯಗೊಂಡಿದ್ದಾರೆ. ಚಕಮಕಿ ನಡೆದ ಸ್ಥಳದಿಂದ 11 ಸ್ವಯಂಚಾಲಿತ ಬಂದೂಕುಗಳನ್ನೂ ವಶಪಡಿಸಿಕೊಳ್ಳಲಾಗಿದೆ.ಪೂವರ್ತಿ ಗ್ರಾಮದ ಕಾಡು ಪ್ರದೇಶದಲ್ಲಿ ನಕ್ಸಲರು ಇದ್ದಾರೆ ಎಂಬ ಮಾಹಿತಿಯ ಆಧಾರದಲ್ಲಿ ಆಂಧ್ರಪ್ರದೇಶ ಮತ್ತು ಜಿಲ್ಲಾ ಪೊಲೀಸ್‌ನ ಗ್ರೇಹೌಂಡ್ ಪಡೆ ಶೋಧಕಾರ್ಯ ನಡೆಸಿತು ಎಂದು ಬಸ್ತಾರ್ ವಲಯದ ಐಜಿಪಿ ಹಿಮಾಂಶು ಗುಪ್ತಾ ತಿಳಿಸಿದ್ದಾರೆ.ಭದ್ರತಾ ಪಡೆಗಳನ್ನು ನೋಡಿದ ಮಾವೊವಾದಿಗಳು ಗುಂಡು ಹಾರಿಸಿದರು ಹಾಗೂ ಇದಕ್ಕೆ ಪ್ರತಿಯಾಗಿ ಭದ್ರತಾ ಪಡೆಗಳೂ ಗುಂಡು ಹಾರಿಸಿದವು ಎಂದು ಅವರು ತಿಳಿಸಿದ್ದಾರೆ.
