ನಾಗಪುರ: ಕಟ್ಟಡ ಕುಸಿತ, ಇಬ್ಬರು ಕಾರ್ಮಿಕರ ಸಾವು

ಇಲ್ಲಿನ ಚಿಕಲಿ ಕೈಗಾರಿಕಾ ಪ್ರದೇಶದಲ್ಲಿನ ನಾಲ್ಕು ಅಂತಸ್ತಿನ ಕಟ್ಟಡವೊಂದು ಕುಸಿದು ಬಿದ್ದ ಪರಿಣಾಮವಾಗಿ ಇಬ್ಬರು ಕಾರ್ಮಿಕರು ಸಾವನ್ನಪ್ಪಿ ಒಂಬತ್ತು ಜನರಿಗೆ ಗಂಭೀರ ಸ್ವರೂಪದ ಗಾಯಗಳಾಗಿವೆ ಎಂದು ಮೂಲಗಳು ವರದಿಮಾಡಿವೆ.

ನಿರ್ಮಾಣ ಹಂತದಲ್ಲಿದ್ದ ಶೀತಲೀಕರಣ ಘಟಕವೊಂದರ ಕಟ್ಟಡವು ಸೋಮವಾರ ತಡ ರಾತ್ರಿಯಲ್ಲಿ ಕುಸಿದು ಬಿದ್ದ ಪರಿಣಾಮವಾಗಿ, ಕಟ್ಟಡ ನಿರ್ಮಾಣ ಕಾರ್ಯದಲ್ಲಿ ತೊಡಗಿದ್ದ ಶಾಂತಾರಾಮ್ ಭಾರತಿ (50) ಮತ್ತು ದಿಲೀಪ್ ವಾಲ್‌ದೆ (49) ಎಂಬ ಇಬ್ಬರು ಕಾರ್ಮಿಕರು ಮೃತಪಟ್ಟಿದ್ದು 9 ಜನರಿಗೆ ತೀವ್ರತರಹದ ಗಾಯಗಲಾಗಿವೆ ಎಂದು ತಿಳಿದು ಬಂದಿದೆ. ಮತ್ತಷ್ಟೂ ಕಾರ್ಮಿಕರು ಕಟ್ಟಡದಲ್ಲಿ ಸಿಲುಕಿರಬಹುದೆಂಬ ಅನುಮಾನಗಳಿವೆ.

ಗಾಯಳುಗಳಲ್ಲಿ ಇಬ್ಬರು ಮಹಿಳಾ ಕಾರ್ಮಿಕರು ಮತ್ತು ಇಬ್ಬರು ಅಪ್ರಾಪ್ತ ವಯಸ್ಕರೆಂದು ಗುರುತಿಸಲಾಗಿದೆ. ಗಾಯಗೊಂಡಿರುವವರನ್ನು ಇಲ್ಲಿನ ಮಯೋ ಜನರಲ್ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ.

ಪರಿಹಾರ ಮತ್ತು ರಕ್ಷಣಾ ಕಾರ್ಯವು ಇನ್ನೂ ಎರಡು ದಿನಗಳ ಅವಧಿಯಲ್ಲಿ ನಡೆಯಲಿದೆ ಎಂದು ಅಧಿಕಾರಿಗಲು ತಿಳಿಸಿರುವರು. ಈ ಕುರಿತಂತೆ ಕಟ್ಟಡದ ಮಾಲೀಕರಾಗಿರುವ ಪ್ರಮೋದ್ ಕಾಂದೇವಾಲರನ್ನು ಪ್ರಶ್ನಿಸಲಾಗಿದೆ. ಕಟ್ಟಡ ಕುಸಿದು ಬಿದ್ದ ಪರಿಣಾಮವಾಗಿ ಅಮೋನಿಯಾ ಮತ್ತು ಕಾರ್ಬನ್ ಡೈಯಾಕ್ಸೈಡ್‌ನಂತಹ ವಿಷಾನಿಲಗಳು ಸೋರಿಕೆಯಾಗುತ್ತಿರುವುದರಿಂದ ಸುತ್ತಮುತ್ತಲಿನ ನಿವಾಸಿಗಳನ್ನು ಸ್ಥಳಾಂತರಿಸಲಾಗಿದೆ ಎಂದು ಆಡಳಿತ ಮೂಲಗಳು ತಿಳಿಸಿವೆ.