ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಜಂಟಿ ಪ್ರಧಾನ ಕಾರ್ಯದರ್ಶಿಯಾಗಿದ್ದ 52 ವರ್ಷ ವಯಸ್ಸಿನ ಕೆ.ಸಿ.ಕಣ್ಣನ್ ಮಹಿಳೆಯೊಂದಿಗೆ ಆಕ್ರಮ ಸಂಬಂಧ ಹೊಂದಿರುವುದು ಬಹಿರಂಗವಾದ ಹಿನ್ನೆಲೆಯಲ್ಲಿ ಅವರನ್ನು ಆರೆಸ್ಸೆಸ್‌ನಿಂದ ಹೊರಹಾಕಲಾಗಿದೆ ಎಂದು ಮೂಲಗಳು ತಿಳಿಸಿವೆ.
ಆರೆಸ್ಸೆಸ್ ಸಂಘಟನೆಯ ಪದಾಧಿಕಾರಿಗಳಲ್ಲಿ ಮೂರನೇ ಉನ್ನತ ಸ್ಥಾನ ಹೊಂದಿದ್ದ ಕಣ್ಣನ್, ಕಳೆದ 2012ರಲ್ಲಿ ಜಂಟಿ ಪ್ರಧಾನ ಕಾರ್ಯದರ್ಶಿಯಾಗಿ ನೇಮಕಗೊಂಡಿದ್ದರು. ಇಂತಹ ಉನ್ನತ ಸ್ಥಾನದಲ್ಲಿರುವ ವ್ಯಕ್ತಿಯನ್ನು ವಜಾಗೊಳಿಸಿರುವುದು ಮೊದಲ ಬಾರಿಯಾಗಿದೆ.
ಏತನ್ಮಧ್ಯೆ, ಆರೆಸ್ಸೆಸ್ ಪ್ರಚಾರಕರಲ್ಲಿ ಕೆಳಮಟ್ಟದಲ್ಲಿ ವಿವಾಹಿತ ಪ್ರಚಾರಕರಿರುತ್ತಾರೆ.ಆದರೆ, ಉನ್ನತ ಸ್ಥಾನದಲ್ಲಿ ಪ್ರಚಾರಕರು ಸಾಮಾನ್ಯವಾಗಿ ಅವಿವಾಹಿತರಾಗಿರುತ್ತಾರೆ. ಜಂಟಿ ಪ್ರಧಾನ ಕಾರ್ಯದರ್ಶಿಯಾಗಿ ಆಯ್ಕೆಯಾದ ನಂತರವೂ ಕಣ್ಣನ್ ಮಹಿಳೆಯೊಂದಿಗೆ ಅಕ್ರಮ ಸಂಬಂಧ ಮುಂದುವರಿಸಿದ್ದರು ಎಂದು ಆರೆಸ್ಸೆಸ್ ಮೂಲಗಳು ತಿಳಿಸಿವೆ.
ಆರೆಸ್ಸೆಸ್ ಪ್ರಚಾರ ವಿಭಾಗದ ಮುಖ್ಯಸ್ಥ ಮನಮೋಹನ್ ವೈದ್ಯ ಅವರಿಗೆ ವಿವರಣೆ ಕೇಳಿದಾಗ, ಕಣ್ಣನ್ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿರುವುದರಿಂದ ಮನೆಗೆ ವಾಪಸಾಗಲು ನಿರ್ಧರಿಸಿದ್ದಾರೆ. ಕೌಟಂಬಿಕ ಜೀವನ ನಡೆಸುವುದಾಗಿ ಒಂದು ತಿಂಗಳ ಮೊದಲೇ ನಮಗೆ ಮಾಹಿತಿ ನೀಡಿದ್ದರು ಎಂದು ಸ್ಪಷ್ಟನೆ ನೀಡಿದ್ದಾರೆ.