ಹಣ ಕಳೆದುಕೊಂಡು ಆತ್ಮಹತ್ಯೆ ಪ್ರಕರಣಕ್ಕೆ ಹೊಸ ಟ್ವಿಸ್ಟ್

ನೋಟುಗಳ ವಿನಿಮಯದ ವೇಳೆ ಹಣ ಕಳ್ಕೊಂಡಿದ್ದಕ್ಕೆ ಬೇಸತ್ತುಕೊಂಡ ಮಹಿಳೆಯೋರ್ವರು ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ಹೇಳಲಾಗಿದ್ದ ಪ್ರಕರಣಕ್ಕೆ ಹೊಸ ಟ್ವೀಟ್ ಸಿಕ್ಕಿದೆ. ಅವರದು ಸಹಜ ಸಾವು, ಆತ್ಮಹತ್ಯೆಯಲ್ಲ ಎಂದು ತಿಳಿದುಬಂದಿದೆ. ಭಾನುವಾರ ಚಿಕ್ಕಬಳ್ಳಾಪುರ ಜಿಲ್ಲೆಗುಡಿಬಂಡೆ ತಾಲ್ಲೂಕಿನ ಚೆಂಡೂರು ಗ್ರಾಮದಲ್ಲಿ ಈ ಘಟನೆ ನಡೆದಿತ್ತು.

ನಿನ್ನೆ ಈಶ್ವರಮ್ಮ ಹಣ ವಿನಿಮಯ ಮಾಡಿಕೊಳ್ಳಲು ಗುಡಿಬಂಡೆಯಲ್ಲಿರುವ ಪ್ರಗತಿ ಗ್ರಾಮೀಣ ಬ್ಯಾಂಕ್‌ಗೆ ಹೋಗಿದ್ದರು. ನೂಕು ನುಗ್ಗಲಿನಲ್ಲಿ ಆಕೆ ಹಣವನ್ನು ಕಳೆದುಕೊಂಡಿದ್ದು, ಈ ಕುರಿತು ಬ್ಯಾಂಕ್‌ನವರಿಗೆ ದೂರು ನೀಡಿದಾಗ ಅವರು ನಮ್ಮಲ್ಲಿ ಸಿಸಿ ಕ್ಯಾಮರಾ ಇಲ್ಲವೆಂದು ಹೇಳಿದ್ದಾರೆ.

ಕಳೆದ 6 ತಿಂಗಳ ಹಿಂದೆ ಮನೆಯನ್ನು ಕಳೆದುಕೊಂಡಿದ್ದ ಈಶ್ವರಮ್ಮ ಮತ್ತೀಗ ಇದ್ದ ಹಣವನ್ನು ಸಹ ಕಳೆದುಕೊಂಡು ನೊಂದಿದ್ದರು. ಈ ಕುರಿತು ವಿಪರೀತ ಚಿಂತೆ ಮಾಡಿದ್ದ ಅವರು ಅದೇ ಆಘಾತದಿಂದ ರಾತ್ರಿ ಮಲಗಿದ್ದಾಗ ಹೃದಯಾಘಾತದಿಂದ ಸಾವನ್ನಪ್ಪಿದ್ದಾರೆ. ಆದರೆ ಪರಿಹಾರದ ಆಶೆಗೆ ಆಕೆಯ ಮನೆಯವರು ಇದು ಆತ್ಮಹತ್ಯೆ ಎಂಬ ಕಟ್ಟುಕತೆಯನ್ನು ಕಟ್ಟಿದ್ದರು. ಬಹಳ ಬಡ ಕುಟುಂಬದವಾದ್ದರಿಂದ ಊರಿನ ಹಿರಿಯರೇ ಈ ಸುಳ್ಳುಕತೆ ಸೃಷ್ಟಿಸುವ ಸಲಹೆ ನೀಡಿದ್ದರು ಎಂದು ತಿಳಿದುಬಂದಿದೆ. 

ಪ್ರಕರಣವನ್ನು ದಾಖಲಿಸಿಕೊಂಡಿರುವ ಗುಡಿಬಂಡೆ ಪೊಲೀಸರು ತನಿಖೆಯನ್ನು ಮುಂದುವರೆಸಿದ್ದಾರೆ.