ಸ್ಯಾಂಡಲ್​ವುಡ್​ ಹೀರೋ ಅರೆಸ್ಟ್

ಚಿತ್ರರಂಗದಲ್ಲಿ ಬದುಕು ಕಟ್ಟಿಕೊಳ್ಳಬೇಕು ಎಂದು ಬಂದು ಹೆಣ್ಣುಮಕ್ಕಳ ದಂಧೆಗೆ ಇಳಿದ ಸ್ಯಾಂಡಲ್​ವುಡ್ ಹೀರೋ ಮಂಜುನಾಥ್ ಅಲಿಯಾಸ್ ಸಂಜು ಈಗ ಅರೆಸ್ಟ್ ಆಗಿದ್ದಾನೆ. ಮಂಜುನಾಥ್ ಹೆಸರಿನ ಹೀರೋ ಲೊಕ್ಯಾಂಟೋ ಆ್ಯಪ್​​​ನ ಹಿಂದೆ ಬಿದ್ದಿದ್ದ. ಈ ಆ್ಯಪ್ ಮೂಲಕ ಸುಲಿಗೆಗೆ ಇಳಿದಿದ್ದ. ಹೆಣ್ಣು ಮಕ್ಕಳ ಫೊಟೋ ಬಳಸಿ ನಕಲಿ ಪ್ರೊಫೈಲ್ ಸೃಷ್ಟಿ ಮಾಡುತ್ತಿದ್ದ. ಈ ದಂಧೆಯಲ್ಲಿ ಮಂಜುನಾಥ್ ಪ್ರಮುಖ ಆರೋಪಿ ಆಗಿದ್ದಾನೆ. ಸದ್ಯ, ಬೆಂಗಳೂರಿನ ಸುದ್ದುಗುಂಟೆಪಾಳ್ಯದ ಪೊಲೀಸರು ಈತನನ್ನು ಬಂಧಿಸಿ ವಿಚಾರಣೆ ಆರಂಭಿಸಿದ್ದಾರೆ. 2019ರಲ್ಲಿ ಬಿಡುಗಡೆಯಾಗಿದ್ದ ಸೈಕಲಾಜಿಕಲ್​ ಥ್ರಿಲ್ಲರ್ ‘ನ್ಯೂರಾನ್’ ಹೆಸರಿನ ಚಿತ್ರದಲ್ಲಿ ಮಂಜುನಾಥ್ ನಟಿಸಿದ್ದ. ನಂತರ ನಟನೆ ಬಿಟ್ಟು ಹೆಣ್ಣುಮಕ್ಕಳ ದಂಧೆಗೆ ಇಳಿದಿದ್ದ. ಯುವ ಎಂಬ ಹೆಸರಿನಲ್ಲಿ ಈತ ಪರಿಚಯಿಸಿಕೊಂಡಿದ್ದ. ಇದೇ ಹೆಸರಿನಲ್ಲಿ ಚಿತ್ರರಂಗಕ್ಕೆ ಪ್ರವೇಶ ಪಡೆದಿದ್ದ. ದುಷ್ಕೃತ್ಯಕ್ಕೆ ಲೊಕ್ಯಾಂಟೋ ಆ್ಯಪ್​​ ಬಳಕೆ ಆಗುತ್ತಿದೆ. ಈ ಆ್ಯಪ್​​ನಲ್ಲಿ ಹುಡುಗಿಯರ ಫೋಟೊ ಬಳಸಿ ಗ್ರಾಹಕರನ್ನ ಸೆಳೆದು ಗ್ಯಾಂಗ್ ಒಂದು ಸುಲಿಗೆ ಮಾಡುತ್ತಿತ್ತು. ಆನ್​​ಲೈನ್ ಹಾಗು ನೇರವಾಗಿ ಸಂಪರ್ಕಿಸಿ ಹಣ ಪೀಕುತ್ತಿತ್ತು. ಈ ಸಂಬಂಧ ಸುದ್ದುಗುಂಟೆ ಪಾಳ್ಯ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಈ ಸಂಬಂಧ ತನಿಖೆಗಿಳಿದಾಗ ಪೊಲೀಸರಿಗೆ ಶಾಕಿಂಗ್ ವಿಚಾರ ಬೆಳಕಿಗೆ ಬಂದಿತ್ತು. ಈ ಗ್ಯಾಂಗ್​ನಲ್ಲಿ ಸ್ಯಾಂಡಲ್​ವುಡ್ ಹೀರೋ ಇರುವ ವಿಚಾರ ಗೊತ್ತಾಗಿತ್ತು. ಈ ಸಂಬಂಧ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ. ಈ ಪ್ರಕರಣವನ್ನು ಮತ್ತಷ್ಟು ಆಳವಾಗಿ ತನಿಖೆ ನಡೆಸಲು ಪೊಲೀಸರು ಪ್ರಯತ್ನಿಸುತ್ತಿದ್ದಾರೆ.