ರೈತನಿಗಿಲ್ಲ ಪರಿಹಾರ: ಸರ್ಕಾರಿ ಕಚೇರಿ ಜಪ್ತಿಗೆ ಆದೇಶಿಸಿದ ನ್ಯಾಯಾಲಯ

ಕೆರೆ ನಿರ್ಮಾಣಕ್ಕೆಂದು ರೈತರೋರ್ವರಿಂದ ಕೃಷಿ ಭೂಮಿಯನ್ನು ವಶಪಡಿಸಿಕೊಂಡು ಸೂಕ್ತ ಪರಿಹಾರ ನೀಡುವಲ್ಲಿ ಸರ್ಕಾರದ ಅಧಿಕಾರಿಗಳು ವಿಫಲರಾಗಿದ್ದಾರೆ ಎಂಬ ಕಾರಣದಿಂದ ಇಲ್ಲಿನ ಜಿಲ್ಲಾ ಸತ್ರ ನ್ಯಾಯಾಲಯವು ನಗರದಲ್ಲಿರುವ ಪಂಚಾಯತ್ ರಾಜ್ ಎಂಜಿನಿಯರಿಂಗ್ ಕಚೇರಿಯನ್ನು ಜಪ್ತಿ ಮಾಡಿಕೊಳ್ಳಲು ಆದೇಶಿಸಿದೆ.   

ಪ್ರಕರಣದ ಹಿನ್ನೆಲೆ: ಇದು 2008ನೇ ಸಾಲಿನ ಪ್ರಕರಣವಾಗಿದ್ದು, 2 ಗ್ರಾಮಗಳಿಗೆ ಕುಡಿಯುವ ನೀರನ್ನು ಸರಬರಾಜು ಮಾಡಲೆಂದು ಇಲ್ಲಿನ ರೈತರೋರ್ವರಿಂದ 9 ಎಕರೆ 31 ಗುಂಟೆ ಭೂಮಿಯನ್ನು ಪಂಚಾಯತ್ ರಾಜ್ ಇಲಾಖೆ ವಶಪಡಿಸಿಕೊಂಡಿತ್ತು. 

ಆ ಖರೀದಿ ವೇಳೆಯಲ್ಲಿ ಒಂದು ಗುಂಟೆ ಭೂಮಿಗೆ 11025ರೂ ನೀಡಿ ಖರೀದಿಸಲಾಗಿತ್ತು. ಆದರೆ ಇದು ಸರ್ಕಾರಿ ಮೌಲ್ಯಕ್ಕಿಂತಲೂ ಕಡಿಮೆ ಇದ್ದು ನನಗೆ ನೀಡಿರುವ ಪರಿಹಾರ ಸೂಕ್ತವಲ್ಲ ಎಂದು ಸರ್ಕಾರದ ವಿರುದ್ಧ ಭೂಮಿ ನೀಡಿದ್ದ ರೈತ ಸೂಕ್ತ ಪರಿಹಾರ ಕೊಡಿಸುವಂತೆ ಕೋರಿ ನ್ಯಾಯಾಲಯದ ಮೆಟ್ಟಿಲೇರಿದ್ದರು. ಈ ಹಿನ್ನೆಲೆಯಲ್ಲಿ ಪ್ರಕರಣದ ವಿಚಾರಣೆ ನಡೆಸಿದ್ದ ನ್ಯಾಯಾಲಯ, ಒಂದು ಗುಂಟೆಗೆ 21648 ರೂ. ಪರಿಹಾರ ನೀಡುವಂತೆ ಸೂಚಿಸಿ 2014ರ ಜನವರಿಯಲ್ಲಿ ಆದೇಶಿಸಿತ್ತು.  

ಹೀಗೆ ಒಟ್ಟು 1 ಕೋಟಿ 64 ಲಕ್ಷ ಪರಿಹಾರ ನೀಡಲು ತೀರ್ಪಿತ್ತಿತ್ತು. ಆದರೆ ಈ ಹಣವನ್ನು ಮತ್ತೊಂದು ಇಲಾಖೆ ನೀಡಲಿದೆ. ಇದು ನಮಗೆ ಸಂಬಂಧಿಸಿದ್ದಲ್ಲ. ಎಸಿ ಕಚೇರಿಗೆ ಸಂಬಂಧಿಸಿದ್ದಾಗಿದೆ ಎಂದು ಪಂಚಾಯತ್ ಇಲಾಖೆ ಅಧಿಕಾರಿಗಳು ಪರಿಹಾರ ನೀಡಲು ನಿರಾಕರಿಸಿದ್ದರು. ಈ ಹಿನ್ನೆಲೆಯಲ್ಲಿ ನ್ಯಾಯಾಲಯದ ಆದೇಶಕ್ಕೆ ತಕ್ಕಂತೆ ನಡೆದುಕೊಳ್ಳದೆ, ಪರಿಹಾರವನ್ನೂ ನೀಡದೆ ಸತಾಯಿಸುತ್ತಿದ್ದು, ಅಧಿಕಾರಿಗಳು ಬೇಜವಾಬ್ದಾರಿಯಿಂದ ವರ್ತಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಇಂದೇ ನಗರದಲ್ಲಿನ ಪಂಚಾಯತ್ ರಾಜ್ ಕಚೇರಿಯನ್ನು ಜಪ್ತಿ ಮಾಡಿಕೊಳ್ಳಿ ಎಂದು ನ್ಯಾಯಾಲಯ ಆದೇಶ ಹೊರಡಿಸಿದೆ. 

ಈ ಹಿನ್ನೆಲೆಯಲ್ಲಿ ನ್ಯಾಯಾಲಯದ ಸಿಬ್ಬಂದಿಗಳು ಇಂದು ಇಲಾಖೆಯ ಕಟ್ಟಡಕ್ಕೆ ಮುತ್ತಿಗೆ ಹಾಕಿದ್ದು, ಸಂಪೂರ್ಣವಾಗಿ ಜಪ್ತಿ ಮಾಡಿಕೊಂಡಿದ್ದಾರೆ. ಈ ವೇಳೆ ಕೋರ್ಟ್ ಸಿಬ್ಬಂದಿ ಹಾಗೂ ಸರ್ಕಾರಿ ವಕೀಲರ ನಡುವೆ ಕೆಲ ಹೊತ್ತಿನ ವಾದ-ವಿವಾದಗಳು ನಡೆದವು. ಆದರೂ ಕಚೇರಿಯನ್ನು ಜಪ್ತಿ ಮಾಡುವಲ್ಲಿ ನ್ಯಾಯಾಲಯದ ಸಿಬ್ಬಂದಿ ಯಶಸ್ವಿಯಾದರು.