ರೈಲಿಗೆ ಸಿಲುಕಿ ತಾಯಿ-ಮಗು ಸಾವು

ಹಳಿ ದಾಟುತಿದ್ದ ತಾಯಿ ಮತ್ತು ಮಗುವಿನ ಮೇಲೆ ರೈಲು ಹರಿದು ಅವರಿಬ್ಬರು ಮೃತಪಟ್ಟ ದಾರುಣ ಘಟನೆ ಸೋಮವಾರ ಪ್ರಾತಃ ಕಾಲ ಬೆಂಗಳೂರಿನಲ್ಲಿ ನಡೆದಿದೆ.

ಬಿಹಾರ್ ಮೂಲದ ಕುಸುಬುದೇವಿ(28) ಮತ್ತು ಒಂದುವರೆ ವರ್ಷದ ಮಗು ಸುನೀತಾ ಮೃತಪಟ್ಟ ದುರ್ದೈವಿಗಳಾಗಿದ್ದಾರೆ. 

ವೈಟ್‌ಫೀಲ್ಡ್ - ಕೆ. ಆರ್.ಪುರಂ ನಡುವಿನ ಹೂಡಿ ರೈಲ್ವೆ ಗೇಟ್‌ನಲ್ಲಿ  ಈ ಘಟನೆ ನಡೆದಿದ್ದು ಮೃತರ ಕುಟುಂಬ ಬಿಹಾರಕ್ಕೆ ಹೊರಟಿತ್ತು.

ಬೆಂಗಳೂರಿನಲ್ಲಿ ಗಾರೆ ಕೆಲಸ ಮಾಡಿಕೊಂಡಿದ್ದ ಅಮರದೀಪ್ ಮತ್ತು ಕುಸುಬುದೇವಿ ಕುಟುಂಬ ತಮ್ಮ ಸಂಬಂಧಿಕರೊಬ್ಬರ ಮದುವೆ ಇದ್ದ ಕಾರಣ ಹುಟ್ಟೂರಿಗೆ ಹೊರಟಿತ್ತು. ಹೂಡಿ ರೈಲ್ವೆ ಗೇಟ್ ಮುಚ್ಚಿದ್ದರೂ ಸಹ ಅದರೊಳಗೆ ನುಗ್ಗಿ ಅಮರದೀಪ್ ಮತ್ತು ಇಬ್ಬರು ಮಕ್ಕಳು ಹಳಿ ದಾಟಿ ಹೋದರು. 

ಇನ್ನೊಂದು ಮಗುವನ್ನೆತ್ತಿಕೊಂಡು ಹಿಂದೆ ಬರುತ್ತಿದ್ದ ಕುಸುಬುದೇವಿ ಹಳಿ ದಾಟಿದ್ದಳಾದರೂ ಮಗುವಿನ ಚಪ್ಪಲಿ ಕೆಳಗೆ ಬಿದ್ದಿದೆ ಎಂದು ಅದನ್ನೆತ್ತಲು ಹಿಂತಿರುಗಿದ್ದಳು. ಹಳಿ ಮೇಲೆ ಬಿದಿದ್ದ ಚಪ್ಪಲಿ ಎತ್ತುತ್ತಿದ್ದ ಆಕೆಗೆ ಕತ್ತಲಿದ್ದರಿಂದ ರೈಲು ಬರುತ್ತಿದ್ದುದು ಕಾಣಿಸಿಲ್ಲ. ರೈಲು ರೈಲು ಎಂದು ಪತಿ ಕಿರುಚಿಕೊಂಡನಾದರೂ ಅದಾಗಲೇ ರೈಲು ತಾಯಿ ಮಗುವನ್ನು ಬಲಿ ತೆಗೆದುಕೊಂಡಾಗಿತ್ತು. 

ಕಂಟೋನ್ಮೆಂಟ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.