ಇಂದು ರಾಜ್ಯ ಬಿಜೆಪಿ ಘಟಕದ ರಾಜ್ಯಾಧ್ಯಕ್ಷ ಪ್ರಹ್ಲಾದ ಜೋಷಿ ಅವರ ನೇತೃತ್ವದಲ್ಲಿ ಪಕ್ಷದ ಸಭೆ ನಡೆದಿದ್ದು, ಕರ್ನಾಟಕ ರಾಜ್ಯದಲ್ಲಿ ಬಿಜೆಪಿ ಸದಸ್ಯತ್ವವನ್ನು ಒಂದು ಕೋಟಿಗೆ ಏರಿಸುವ ಬಗ್ಗೆ ಅಗತ್ಯ ನಿರ್ಣಯ ಕೈಗೊಳ್ಳಲಾಯಿತು.
ಸಭೆಯು ಪಕ್ಷದ ರಾಜ್ಯಾಧ್ಯಕ್ಷ ಪ್ರಹ್ಲಾದ ಜೋಷಿ ಅವರ ನೇತೃತ್ವದಲ್ಲಿ ನಗರದ ಮಲ್ಲೇಶ್ವರಂನಲ್ಲಿನ ಬಿಜೆಪಿ ಕಚೇರಿಯಲ್ಲಿ ನಡೆಯಿತು. ಸಭೆಯಲ್ಲಿ ಜಿಲ್ಲಾವಾರು ಸದಸ್ಯತ್ವ ನೋಂದಣಿ ಆರಂಭಿಸುವ ಬಗ್ಗೆ ಅಗತ್ಯ ನಿರ್ಣಯ ಕೊಗೊಳ್ಳಲಾಯಿತು. ಅಲ್ಲದೆ ಸದಸ್ಯತ್ವ ನೋಂದಣಿಯು ಜಿಲ್ಲಾ ಮಟ್ಟದಲ್ಲಿ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಜವಾಬ್ದಾರಿಯನ್ನು ಪಕ್ಷದ ಜಿಲವ್ಲಾಧ್ಯಕ್ಷರಿಗೇ ವಹಿಸಲು ತೀರ್ಮಾನಿಸಲಾಯಿತು. ಈಗಾಗಲೇ ಪಕ್ಷವು 68 ಲಕ್ಷ ಸದಸ್ಯರನ್ನು ಹೊಂದಿದ್ದು, ಇನ್ನೆರಡು ತಿಂಗಳಿನ ಒಳಗೆ ಅದನ್ನು ಒಂದು ಕೋಟಿಗೆ ಏರಿಸಲು ನಾಯಕರು ಪಣ ತೊಟ್ಟಿದ್ದಾರೆ.
ಸಭೆಯಲ್ಲಿ ಸಂಸದ ಅನಂತ ಕುಮಾರ್, ಮಾಜಿ ಸಚಿವ, ಪಕ್ಷದ ನಾಯಕ ವಿ.ಸೋಮಣ್ಣ ಹಾಗೂ ಪಕ್ಷದ ಜಿಲ್ಲಾಧ್ಯಕ್ಷರು ಮತ್ತು ನೋಂದಣಿ ಅಭಿಯಾನದ ಪ್ರಭಾರಿಗಳು ಭಾಗವಹಿಸಿದ್ದರು.
