ಬಳ್ಳಾರಿಯ ಹೊಲವಲಯದಲ್ಲಿ ಅನ್ಯಕೋಮುಗಳಿಗೆ ಸೇರಿದ ಪ್ರೇಮಿಗಳಿಬ್ಬರು ಆತ್ಮಹತ್ಯೆಗೆ ಶರಣಾದ ದಾರುಣ ಘಟನೆ ನಡೆದಿದೆ. ಪಿಐಟಿಎಂ ಇಂಜಿನಿಯರಿಂಗ್ ಕಾಲೇಜಿನ ಬಳಿ ಪ್ರೇಮಿಗಳಿಬ್ಬರು ಆತ್ಮಹತ್ಯೆ ಮಾಡಿಕೊಂಡಿದ್ದು, ಇವರಿಬ್ಬರ ಶವಗಳು ಸಂಪೂರ್ಣ ಕೊಳೆತ ಸ್ಥಿತಿಯಲ್ಲಿ ಪತ್ತೆಯಾಗಿದೆ. ಇವರಿಬ್ಬರ ಮೃತದೇಹಗಳನ್ನು ನಾಯಿ, ನರಿಗಳು ತಿಂದು ಬಿಟ್ಟು ಮೂಳೆಯ ಅವಶೇಷಗಳು ಮಾತ್ರ ಸಿಕ್ಕಿದೆ.
ವಿಷ ಸೇವಿಸಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆಂದು ತಿಳಿದುಬಂದಿದೆ. ಇವರಿಬ್ಬರೂ ಬಳ್ಳಾರಿಯ ಕೌಲ್ ಬಜಾರ್ ನಿವಾಸಿಗಳು. ಆಗಸ್ಟ್ 4ರಂದು ತಮ್ಮ ಪುತ್ರಿ ಸಮತಾ ಕಾಣೆಯಾದ ಬಳಿಕ ತಮ್ಮ ಪುತ್ರಿಯನ್ನು ಇಮ್ತಿಯಾಜ್ ಅಪಹರಿಸಿದ್ದಾನೆ ಎಂದು ಅವಳ ಪೋಷಕರು ಪೊಲೀಸರಿಗೆ ದೂರು ನೀಡಿದರು.
ಸಮತಾಳ ಅಣ್ಣ ರಾಜೇಶ್ ಸಹಪಾಠಿಯಾಗಿದ್ದ ಇಮ್ತಿಯಾಜ್ ಕಳೆದ 6 ವರ್ಷಗಳಿಂದ ಸಮತಾಳನ್ನು ಪ್ರೀತಿಸುತ್ತಿದ್ದ. ಸಮತಾ ಬಳ್ಳಾರಿ ಮಹಿಳಾ ಪಿಯು ಕಾಲೇಜಿನ ವಿದ್ಯಾರ್ಥಿನಿಯಾಗಿದ್ದಳು. ಇವರಿಬ್ಬರೂ ಬೇರೆ, ಬೇರೆ ಕೋಮಿಗೆ ಸೇರಿದ್ದರಿಂದ ತಂದೆ, ತಾಯಿಗಳ ವಿರೋಧವೇ ಆತ್ಮಹತ್ಯೆ ಮಾಡಿಕೊಳ್ಳಲು ಪ್ರೇರೇಪಣೆ ನೀಡಿರಬಹುದೆಂದು ಶಂಕಿಸಲಾಗಿದೆ.
