ನಾಡಗೀತೆಗೆ ಹೊಸ ಟಚ್ ನೀಡಿದ ಕನ್ನಡತಿ

ಬೆಂಗಳೂರು: ನಾಡಗೀತೆಯಾದ 'ಜೈ ಭಾರತ ಜನನಿಯ ತನುಜಾತೆ' ಕೇಳದ ಕಿವಿಗಳಿಲ್ಲ. ಈವರೆಗೆ ಒಂದೇ ರಾಗ ಸಂಯೋಜನೆಯಲ್ಲಿ ಕೇಳುತ್ತಿದ್ದೇವು. ಆದರೆ, ಕರ್ನಾಟಕ ರಾಜ್ಯೋತ್ಸವ ಶುಭ ಸಂದರ್ಭದಲ್ಲಿ ಡಾ. ಶಮಿತಾ ಮಲ್ನಾಡ್ ಈ ಹಾಡಿಗೆ ಹೊಸ ರೂಪ ನೀಡಿ ರಾಗ ಸಂಯೋಜನೆ ಮಾಡಿದ್ದಾರೆ. ಅಲ್ಲದೆ, ಕರ್ನಾಟಕದ 5 ತಲೆಮಾರಿನ 59 ಹಿನ್ನಲೆ ಗಾಯಕರನ್ನು ಒಟ್ಟಿಗೆ ಸೇರಿಸಿ ಹಾಡಿಗೆ ದನಿಯಾಗಿಸಿದ್ದಾರೆ.

ಕನ್ನಡದಲ್ಲಿಯೇ ಇದೊಂದು ವಿಭಿನ್ನ ಪ್ರಯೋಗವಾಗಿದ್ದು, ಒಟ್ಟು 4.48 ನಿಮಿಷದ ಈ ಹಾಡು ವಿಡಿಯೋ ರೂಪದಲ್ಲಿ ರಚಿತವಾಗಿದೆ. ಖ್ಯಾತ ಗಾಯಕಿ ಬಿ.ಕೆ. ಸುಮಿತ್ರಾ ವರಿಂದ ಆರಂಭವಾಗುವ ಹಾಡು ಕಸ್ತೂರಿ ಶಂಕರ, ಬಿ.ಆರ್. ಛಾಯಾ, ಪುತ್ತೂರು ನರಸಿಂಹ ನಾಯಕ, ಲತಾ ಹಂಸಲೇಖ, ಗುರುರಾಜ ಹೊಸಕೋಟೆ, ಮಂಜುಳಾ ಗುರುರಾಜ, ರಮೇಶ್ಚಂದ್ರ, ಸಂಗೀತ ಕಟ್ಟಿ, ರಾಜೇಶ ಕೃಷ್ಣನ್ ಸೇರಿದಂತೆ 29 ಗಾಯಕರು ಈ ಹಾಡಿಗೆ ದನಿ ಸೇರಿಸಿದ್ದಾರೆ.

ಆಡಿಯೋ ಜತೆಗೆ ಕರ್ನಾಟಕದ ವಿವಿಧ ಪ್ರೇಕ್ಷಣೀಯ ಸ್ಥಳಗಳು, ಐತಿಹಾಸಿಕ ಸ್ಥಳಗಳ ಚಿತ್ರಗಳನ್ನು ಸೇರಿಸಿರುವುದರಿಂದ ಇನ್ನಷ್ಟು ಸುಂದರವಾಗಿ ಮೂಡಿಬಂದಿದೆ. 'ಮಧುರ ಪಿಸು ಮಾತಿಗೆ' ಹಾಡಿನ ಮೂಲಕ ಸಹೃದಯರ ಮನಗೆಲ್ಲುವಲ್ಲಿ ಯಶಸ್ವಿಯಾದ ಕನ್ನಡತಿ ಡಾ. ಶಮಿತಾ ಮಲ್ನಾಡ್ರ ಹೊಸ ಪ್ರಯೋಗ ಮೊದಲ ದಿನವೇ ಕನ್ನಡಿಗರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿದೆ. ಹೊಸತದೊಂದಿಗೆ ವಿಭಿನ್ನವಾಗಿ ಮೂಡಿಬಂದಿರುವ ನಾಡಗೀತೆಗೆ ಸಂಗೀತ, ಪರಿಕಲ್ಪನೆ, ನಿರ್ವಹಣೆ, ನಿರ್ದೇಶನ ಎಲ್ಲವೂ ಅವರದ್ದೇ ಎನ್ನುವುದು ಮತ್ತೊಂದು ವಿಶೇಷ.