ರೇವ್ ಪಾರ್ಟಿ ನಡೆದ ಸ್ಥಳದಲ್ಲಿ ಕನ್ನಡ ನಟ ಹರ್ಷ: ಮಾಧ್ಯಮಗಳಿಗೆ ಹೇಳಿದ್ದೇ ಬೇರೆ

Photo Courtesy: Instagram

ಬೆಂಗಳೂರು: ಬೆಂಗಳೂರಿನ ಜಿಆರ್ ಫಾರ್ಮ್ ಹೌಸ್ ನಲ್ಲಿ ನಿನ್ನೆ ಬೆಳಗಿನ ಜಾವ ರೇವ್ ಪಾರ್ಟಿ ಮೇಲೆ ದಾಳಿ ನಡೆಸಿದ್ದ ಪೊಲೀಸರು ಹಲವರನ್ನು ಬಂಧಿಸಿದ್ದರು. ಈ ವೇಳೆ ತೆಲುಗು ನಟಿಯರು, ಸಮಾಜದಲ್ಲಿ ಗಣ್ಯರೆನಿಸಿಕೊಂಡ ಕೆಲವರು ಸಿಕ್ಕಿಬಿದ್ದಿದ್ದಾರೆ.

ಪೊಲೀಸರು ಘಟನಾ ಸ್ಥಳದಿಂದ ಮಾದಕ ವಸ್ತುಗಳನ್ನು ವಶಪಡಿಸಿಕೊಂಡಿದ್ದರು. ಬರ್ತ್ ಡೇ ಪಾರ್ಟಿ ಎಂದು ಫ್ಲೆಕ್ಸ್ ಹಾಕಿ ರಾತ್ರಿಯಿಡೀ ಪಾರ್ಟಿ ಮಾಡಲಾಗಿತ್ತು. ಒಳಗೆ ನಟಿಮಣಿಯರನ್ನು ಕರೆಸಿಕೊಂಡು ಡ್ರಗ್ಸ್ ಪಾರ್ಟಿ ಮಾಡಲಾಗಿತ್ತು. ಘಟನಾ ಸ್ಥಳದಲ್ಲಿ ರಾಜಕಾರಣಿಯೊಬ್ಬರ ಪಾಸ್ ಇದ್ದ ಕಾರು ಕೂಡಾ ಪತ್ತೆಯಾಗಿತ್ತು.

ವಿಶೇಷವೆಂದರೆ ಪೊಲೀಸರು ತಪಾಸಣೆ ನಡೆಸುತ್ತಿದ್ದಾಗ ಘಟನಾ ಸ್ಥಳಕ್ಕೆ ಕನ್ನಡ ನಟ ಹರ್ಷ ಕೂಡಾ ಬಂದಿದ್ದರು. ಅವರನ್ನು ಅಲ್ಲಿ ನೋಡಿ ಮಾಧ್ಯಮಗಳು ಪ್ರಶ್ನೆ ಮಾಡಿವೆ. ಈ ವೇಳೆ ನನಗೂ ರೇವ್ ಪಾರ್ಟಿಗೂ ಸಂಬಂಧವಿಲ್ಲ. ಪೊಲೀಸ್ ಅಧಿಕಾರಿಯೊಬ್ಬರನ್ನು ಭೇಟಿ ಮಾಡಲು ಬಂದಿದ್ದೆ ಎಂದು ಸಮಜಾಯಿಷಿ ನೀಡಿದ್ದಾರೆ.

ಘಟನೆಯಲ್ಲಿ ಹಲವು ತೆಲುಗು ನಟಿಯರು ಭಾಗಿಯಾಗಿದ್ದರು. ಪೊಲೀಸ್ ರೈಡ್ ಆಗುತ್ತಿದ್ದಂತೇ ಮುಖಕ್ಕೆ ಮರೆಮಾಚಿಕೊಂಡು ನಟಿಮಣಿಯರು ಸ್ಥಳದಿಂದ ಜಾಗ ಖಾಲಿ ಮಾಡಿದ್ದಾರೆ. ಇದೀಗ ಎಲ್ಲರ ರಕ್ತದ ಮಾದರಿ ಸಂಗ್ರಹಿಸಲಾಗಿದ್ದು, ಡ್ರಗ್ಸ್ ಸೇವನೆ ಮಾಡಿದ್ದಾರೆಯೇ ಎಂದು ಖಚಿತಪಡಿಸಿಕೊಳ್ಳಲಾಗುತ್ತದೆ.