ಮಳೆ ಬಂದರೆ ನಮ್ಮಿಂದ ಎನ್ನುವವರು ಬರ ಬಂದರೆ ಹೊಣೆ ಹೊರುವುದಿಲ್ಲ: ಎಸ್.ಎಂ. ಕೃಷ್ಣ

ಮಳೆ ಬಂದರೆ ಅದಕ್ಕೆ ನಾನೇ ಕಾರಣ ಎನ್ನುವ ರಾಜಕಾರಣಿಗಳು ಬರ ಬಂದಾಗ ಅದರ ಹೊಣೆಯನ್ನು ಹೊರಲು ಸಿದ್ಧರಿರುವುದಿಲ್ಲ ಎನ್ನುವ ಮೂಲಕ ಮಾಜಿ ಮುಖ್ಯಮಂತ್ರಿ ಎಸ್.ಎಂ ಕೃಷ್ಣ ಹಾಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯನವರಿಗೆ ಟಾಂಗ್ ನೀಡಿದ್ದಾರೆ.

ರವೀಂದ್ರ ಕಲಾಕ್ಷೇತ್ರದಲ್ಲಿ ಮಾಜಿ ಸಚಿವ ಹೆಚ್ ವಿಶ್ವನಾಥ್ ಅವರ 'ದಿ ಟಾಕಿಂಗ್ ಶಾಪ್'  ಪುಸ್ತಕ ಬಿಡುಗಡೆ ಸಮಾರಂಭದಲ್ಲಿ ಮಾತನಾಡುತ್ತಿದ್ದ ಅವರು ಚುನಾವಣೆ ಬಳಿಕ ಪರಷ್ಪರ ದ್ವೇಷ ಬೆಳೆಸಿಕೊಳ್ಳುತ್ತೇವೆ. ನಮ್ಮ ಹಿಂಬಾಲಕರು ಅದಕ್ಕೆ ನೀರು-ಗೊಬ್ಬರ ಸುರಿಯುತ್ತಾರೆ. ಒತ್ತಡದಲ್ಲಿರುವ ನಾವು ಅವರು ಹೇಳಿದಂತೆ ನಡೆಯುತ್ತೇವೆ. ರಾಜಕಾರಣದಲ್ಲಿ ಯಾರೂ ಶತ್ರುಗಳು ಇಲ್ಲ, ಮಿತ್ರರೂ ಅಲ್ಲ. ರಾಜಕಾರಣದಲ್ಲಿ ವಿರೋಧಿಗಳ ವಿರುದ್ಧ ಅಸೂಯೆ ಇರಬಾರದು ಎಂದು ಅವರು ಅಭಿಪ್ರಾಯ ಪಟ್ಟಿದ್ದಾರೆ.

ಮದ್ದೂರು ಜನ ಸೋಲಿಸಿದಾಗಲೆಲ್ಲ ನನಗೆ ಒಳ್ಳೆಯದೇ ಆಗಿದೆ. ಅವರು ಸೋಲಿಸಿದಾಗಲೆಲ್ಲ ನನಗೆ ಬಡ್ತಿ ಸಿಕ್ಕಿದೆ. ತನ್ನಿಂದ ತಾನೇ ನನಗೆ ಹೊಸ ಹೊಸ ಅವಕಾಶಗಳು ಹುಡುಕಿಕೊಂಡು ಬಂದಿದೆ. 1967ರಲ್ಲೂ ಸಹ ಹಾಗೇಯೇ ಆಯಿತು. ಅನಂತರ ನಡೆದಿದ್ದ ಉಪ ಚುನಾವಣೆಯಲ್ಲಿ ನಾನು ಗೆಲುವನ್ನು ಸಾಧಿಸಿದೆ. ಆಗ ಇಂದಿರಾ ಗಾಂಧಿ ಅವರ ಪರಿಚಯ ಆಯಿತು. ಸೋತಾಗಲೆಲ್ಲಾ ಬೇರೆ ಬೇರೆ ತಿರುವುಗಳು ಸಿಗುತ್ತದೆ ಎಂದು ಅವರು ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ.