ವರದಕ್ಷಿಣೆದಾಹಕ್ಕೊಳಗಾದ ವ್ಯಕ್ತಿಯೊಬ್ಬ ತನ್ನ ಪತ್ನಿ ಮತ್ತು ಎರಡು ಮಕ್ಕಳಿಗೆ ಸೀಮೆಎಣ್ಣೆ ಸುರಿದು ಬೆಂಕಿ ಹಚ್ಚಿದ ಘಟನೆ ಪಿರಿಯಾ ಪಟ್ಟಣದ ರಾಜನಬಿಳುಗುಲಿಯಲ್ಲಿ ನಡೆದಿದೆ.
ಆರೋಪಿ ದೇವರಾಜ ಪಿರಿಯಾಪಟ್ಟಣದ ಬೆಟ್ಟದಪುರ ಹೋಬಳಿಯ ಲೇಟ್ ಕಾಳಯ್ಯ ಎಂಬುವರ ಮಗಳನ್ನು 2008ರಲ್ಲಿ ಮದುವೆಯಾಗಿದ್ದ. ಆರಂಭದಲ್ಲಿ ಪತ್ನಿ ಜತೆ ಚೆನ್ನಾಗಿಯೇ ಇದ್ದ ದೇವರಾಜ ಕಳೆದ ಒಂದು ವರ್ಷದಿಂದ ತವರಿಂದ ವರದಕ್ಷಿಣೆ ತರುವಂತೆ ಪೀಡಿಸುತ್ತಿದ್ದ. ಹಣ ತರದೇ ಹಿಂತಿರುಗಬೇಡ ಎಂದು ಕೆಲ ದಿನಗಳ ಹಿಂದೆ ಆಕೆಯನ್ನು ತವರಿಗಟ್ಟಿದ್ದ.ಎರಡು ಕಡೆಯವರು ಮಾತುಕತೆ ನಡೆಸಿದ ಬಳಿಕ ಆಕೆ ಪತಿಯ ಮನೆಗೆ ಹಿಂತಿರುಗಿದ್ದಳು.
ಜನವರಿ 28ರಂದು ಪತ್ನಿ ಮತ್ತು ಮಕ್ಕಳನ್ನು ಮನಬಂದಂತೆ ಥಳಿಸಿ ಕೊಂದು ಹಾಕಿದ್ದಾನೆ. ಬಳಿಕ ಸೀಮೆಎಣ್ಣೆ ಸುರಿದು ಬೆಂಕಿ ಹಚ್ಚಿ ಆಕೆ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎಂದು ಸುದ್ದಿ ಹಬ್ಬಿಸಿದ್ದಾರೆ.
ಪಿರಿಯಾಪಟ್ಟಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.