ಪಾನಮತ್ತ ವಿದ್ಯಾರ್ಥಿನಿಯ ಕಾರಿಗೆ ಸಿಕ್ಕಿ ಪಾದಚಾರಿ ಸಾವು

ಕುಡಿದ ಮತ್ತಿನಲ್ಲಿ ಫೂಟ್‌ಪಾತ್ ಮೇಲೆ ಕಾರು ಚಲಾಯಿಸಿದ ವಿದ್ಯಾರ್ಥಿನಿಯೋರ್ವಳು ಪಾದಚಾರಿಯೊಬ್ಬನ ಸಾವಿಗೆ ಕಾರಣಳಾಗಿದ್ದಾಳೆ. ನಗರದ ಲಾಲ್‌ಬಾಗ್ ರಸ್ತೆಯಲ್ಲಿ ನಡೆದ ಈ ದುರ್ಘಟನೆಯಲ್ಲಿ ಮತ್ತೊಬ್ಬ ಗಾಯಗೊಂಡಿದ್ದು , ಮನೆಯೊಂದರ ಕೌಂಪೌಂಡ್ ಮತ್ತು ಮೋಟಾರ್ ಸೈಕಲ್ ಒಂದಕ್ಕೆ ಹಾನಿಯಾಗಿದೆ.

ಮೃತರನ್ನು ತ್ಯಾಗರಾಜನಗರದ ನಿವಾಸಿ ಸುಬ್ರಹ್ಮಣ್ಯ(50) ಎಂದು ಗುರುತಿಸಲಾಗಿದೆ. ಗಾಯಗೊಂಡಿರುವ ಖಾಸಗಿ ಕಂಪನಿ ಉದ್ಯೋಗಿ ಸುಜಿತ್ (26) ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಕೇಂದ್ರ ಬೆಂಗಳೂರಿನ ದೊಡ್ಡಮಾವಳ್ಳಿಯ ಮೂಡಲಪಾಳ್ಯ ರಸ್ತೆಯಲ್ಲಿ ಬುಧವಾರ ರಾತ್ರಿ ಈ ಅಪಘಾತ ನಡೆದಿದ್ದು ಆರೋಪಿಯನ್ನು ನಗರದ ನಿವಾಸಿ ಭವತಾರಿಣಿ ಎಂದು ಗುರುತಿಸಲಾಗಿದೆ. ಲಂಡನ್‌ನ 'ವೆಸ್ಟ್ ಮಿನ್ಸ್ಟರ್ ' ವಿಶ್ವವಿದ್ಯಾಲಯದಲ್ಲಿ ಎಮ್‌ಬಿಎ ಓದುತ್ತಿರುವ ಭವತಾರಣಿ ರಜೆ ಇದ್ದುದರಿಂದ ಕಳೆದ 12 ದಿನಗಳ ಹಿಂದೆ ನಗರಕ್ಕೆ ಬಂದಿದ್ದರು. ರಾತ್ರಿ ಸ್ನೇಹಿತರೊಂದಿಗೆ ಪಾರ್ಟಿ ಮಾಡಿಕೊಂಡು 11 ಗಂಟೆ ಸುಮಾರಿಗೆ ಕಾರ್‌ನಲ್ಲಿ ಮನೆಗೆ ಮರಳುತ್ತಿದ್ದರು. 

ಈ ಸಂದರ್ಭದಲ್ಲಿ ಕುಡಿದ ಮತ್ತಿನಲ್ಲಿದ್ದ ಅವರು ಮಿನರ್ವ್ ಸರ್ಕಲ್ ಬಳಿ ಪಾದಚಾರಿ ರಸ್ತೆಯ ಮೇಲೆ ಕಾರ್ ಚಲಾಯಿಸಿದ ಆಕೆ ಈ ದುರಂತಕ್ಕೆ ಕಾರಣಳಾಗಿದ್ದಾಳೆ. 

ಆರೋಪಿ ವಿದ್ಯಾರ್ಥಿನಿಯನ್ನು ನ್ಯಾಯಾಂಗ ಬಂಧನಕ್ಕೆ ಒಳಪಡಿಸಲಾಗಿದೆ.

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ .