ಸಿಎಂ ಸಿದ್ದರಾಮಯ್ಯ ನೀನು ಸ್ವಾರ್ಥಿ. ಕುರುಡರ ರಾಜ್ಯದಲ್ಲಿ ಒಕ್ಕಣ್ಣನೇ ರಾಜನಂತೆ ಈ ರೀತಿ ನೀನು ರಾಜ್ಯದ ಮುಖ್ಯಮಂತ್ರಿಯಾಗಿದ್ದೀಯಾ ಎಂದು ಮಾಜಿ ಸಚಿವ ವಿ.ಶ್ರೀನಿವಾಸ್ ಪ್ರಸಾದ್ ಸಿಎಂ ಸಿದ್ದರಾಮಯ್ಯ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.
ನಗರದಲ್ಲಿ ಸ್ವಾಭಿಮಾನ ಸಮಾವೇಶಕ್ಕೆ ಚಾಲನೆ ನೀಡಿ ಮಾತನಾಡಿದ ಅವರು, ನಿನ್ನ ಬೆಳೆಸಿದವರು ಜೆಡಿಎಸ್ ರಾಷ್ಟ್ರಾಧ್ಯಕ್ಷ ಎಚ್.ಡಿ.ದೇವೇಗೌಡರು. ಆದರೆ, ನೀನು ಸ್ವಾರ್ಥಿಯಾದೆ ಎಂದು ಏಕವಚನದಲ್ಲಿಯೇ ಸಿಎಂ ವಿರುದ್ಧ ರೋಷಾವೇಶ ವ್ಯಕ್ತಪಡಿಸಿದರು.
ಸಿದ್ದರಾಮಯ್ಯ ನೀನು ಸ್ವಾರ್ಥಿ, ಕರ್ನಾಟಕದ ಬಾವಿಯಲ್ಲಿ ವಟಗುಟ್ಟುತ್ತಿರುವ ಕಪ್ಪೆ ನೀನು. ದೆಹಲಿ ರಾಜಕೀಯ ಸಾಗರದಲ್ಲಿ 25 ವರ್ಷ ಈಜಿ ಬಂದವನು ನಾನು. ಕೇವಲ ಅಸೂಯೆ ದುರುದ್ದೇಶದಿಂದ ನೀನು ನನ್ನನ್ನು ಸಂಪುಟದಿಂದ ಕೈಬಿಟ್ಟೆ ಎಂದು ಗುಡುಗಿದರು.
ಕಳೆದ ಐದು ದಶಕಗಳಿಂದ ನಾನು ರಾಜಕೀಯದಲ್ಲಿದ್ದೇನೆ. ಸಿಎಂ ಸಿದ್ದರಾಮಯ್ಯನವರನ್ನು ಸಂಕಷ್ಟದ ಸಂದರ್ಭದಲ್ಲಿ ಬೆಂಬಲಿಸಿದ್ದೇನೆ. ಆದರೆ, ಯಾವುದೇ ಕಾರಣ ಹೇಳದೆ ಸಚಿವ ಸಂಪುಟದಿಂದ ನನ್ನನ್ನು ಕೈಬಿಡಲಾಯಿತು ಎಂದು ಗುಡುಗಿದ್ದಾರೆ.
ಸಿಎಂ ಸಿದ್ದರಾಮಯ್ಯ ಅವರ ಸ್ವಾರ್ಥತನದಿಂದಾಗಿ ಕರ್ನಾಟಕ ರಾಜ್ಯ ಕಾಂಗ್ರೆಸ್ ಮುಕ್ತವಾಗಲಿದೆ ಎಂದು ಮಾಜಿ ಸಚಿವ ವಿ,ಶ್ರೀನಿವಾಸ್ ಪ್ರಸಾದ್ ಭವಿಷ್ಯ ನುಡಿದಿದ್ದಾರೆ.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ.