ಕಾಂಗ್ರೆಸ್ಸಿಗೆ ಬಯುತ್ತಿದ್ದ ಸಿದ್ದರಾಮಯ್ಯ ಸಿಎಂ ಆಗಿದ್ದಾರೆ. ಇದೀಗ ನೀವು ಕೂಡಾ ಬಿಜೆಪಿಗೆ ಬೈದು ಸಿಎಂ ಆಗಬಹುದು ಎಂದು ವಿಧಾನಪರಿಷತ್ ಸದಸ್ಯ ಬಸವರಾಜ್ ಹೊರಟ್ಟಿ ಹಾಸ್ಯ ಚಟಾಕಿ ಹಾರಿಸಿದರು.
ಲೋಕಸಭೆ ಚುನಾವಣೆ ಬಂದಾಗ ಪಕ್ಷಕ್ಕೆ ಕರೆದುಕೊಂಡು ಚುನಾವಣೆ ಮುಗಿದ ಬಳಿಕ ಪಕ್ಷದಿಂದ ಹೊರಹಾಕ್ತಾರೆ ಇದು ಯಾವ ನ್ಯಾಯ ಎಂದು ಯಾತ್ನಾಳ ನೀಡಿದ ಹೇಳಿಕೆಗೆ ತಿರುಗೇಟು ನೀಡಿದ ಹೊರಟ್ಟಿ, ನಿಮ್ಮ ಪರವಾಗಿ ಯಾಕೆ ಈಶ್ವರಪ್ಪನವರು ಮಾತನಾಡುವುದಿಲ್ಲ ಎಂದರು.
ಈಶ್ವರಪ್ಪನವರು ನನ್ನ ಪರವಾಗಿ ಮಾತನಾಡಿದರೆ ನಾನು ಪಕ್ಷದಿಂದ ಹೊರಹೋದಲ್ಲಿ ಅವರು ನನ್ನ ಜೊತೆ ಬರಬೇಕಾಗುತ್ತದೆ. ಆದ್ದರಿಂದ ಅವರು ನನ್ನ ಪರವಾಗಿ ಮಾತನಾಡುವುದಿಲ್ಲ. ನನ್ನ ಜೊತೆ ಬಂದ್ರೆ ಪಕ್ಷೇತರ ಸರಕಾರ ರಚನೆಯಾಗಬಹುದು ಎಂದಾಗ ಸದನ ನಗೆಗಡಲಲ್ಲಿ ತೇಲಿತು.
ಇದರಿಂದ ಕೆರಳಿದ ಕೆ.ಎಸ್. ಈಶ್ವರಪ್ಪ, ಸಿದ್ದರಾಮಯ್ಯ ಮತ್ತು ವಿ.ಎಸ್.ಉಗ್ರಪ್ಪ ಹಿಂದೆ ಜೆಡಿಎಸ್ ಪಕ್ಷದಲ್ಲಿದ್ದರು. ಜೆಡಿಎಸ್ ಪಕ್ಷದಲ್ಲಿದ್ದಾಗ ಕಾಂಗ್ರೆಸ್ ಪಕ್ಷದ ಯಾವ ಯಾವ ರೀತಿ ಹೇಳಿಕೆ ನೀಡಿದ್ದೀರಿ ಎನ್ನುವುದನ್ನು ಆತ್ಮಸಾಕ್ಷಿಯಾಗಿ ಹೇಳಿ ಎಂದು ಸವಾಲ್ ಹಾಕಿದರು.
ಯಡಿಯೂರಪ್ಪ ಕೆಜಿಪಿ ಕಟ್ಟಿದಾಗ ಬಿಜೆಪಿ ವಿರುದ್ಧ ಏನೇನು ಮಾತನಾಡಿದ್ರೂ ಎನ್ನುವುದನ್ನು ಮೊದಲು ನೀವು ಹೇಳಿ ಎಂದು ಯಾತ್ನಾಳ ಈಶ್ವರಪ್ಪನವರನ್ನು ಕೆಣಕಿದಾಗ ಈಶ್ವರಪ್ಪ, ನಿಮ್ಮ ಮುಂದಿನ ಭವಿಷ್ಯ ಎಲ್ಲಿದೆ ಎನ್ನುವುದು ನಿಮಗೂ ಗೊತ್ತಿದೆ. ಯಾತ್ನಾಳ ಈ ಜನ್ಮದಲ್ಲಿಯೇ ಕಾಂಗ್ರೆಸ್ ಪಕ್ಷಕ್ಕೆ ಹೋಗುವುದಿಲ್ಲ ಎಂದು ತಿರುಗೇಟು ನೀಡಿದರು.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ.