ಬಿವೈ ವಿಜಯೇಂದ್ರ ಸಾವಿರಾರು ಕೋಟಿ ಹೊಡೆದಿದ್ದಾರೆ: ಗಂಭೀರ ಆರೋಪ ಮಾಡಿದ ಬಸನಗೌಡ ಪಾಟೀಲ್ ಯತ್ನಾಳ್

ಹುಬ್ಬಳ್ಳಿ: ಬಿಜೆಪಿ ರಾಜ್ಯಾಧ್ಯಕ್ಷ ಬಿವೈ ವಿಜಯೇಂದ್ರ ಮತ್ತು ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್ ನಡುವಿನ ಶೀತಲ ಸಮರ ತಾರಕಕ್ಕೇರಿದೆ. ಸ್ಟಾರ್ ಪ್ರಚಾರಕ ಪಟ್ಟಿಯಿಂದ ತಮ್ಮನ್ನು ಕೈ ಬಿಟ್ಟಿದ್ದಕ್ಕೆ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್ ಕೆಂಡಾಮಂಡಲರಾಗಿದ್ದು ವಿಜಯೇಂದ್ರ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ.

ಈಗ ನಡೆಯಲಿರುವ ಉಪಚುನಾವಣೆಯಲ್ಲಿ ಬಿಜೆಪಿ ಸ್ಟಾರ್ ಪ್ರಚಾರಕರ ಪಟ್ಟಿಯನ್ನು ಬಿಜೆಪಿ ಚುನಾವಣಾ ಆಯೋಗಕ್ಕೆ ನೀಡಿದೆ. ಈ ಪಟ್ಟಿಯಲ್ಲಿ ಬಸನಗೌಡ ಪಾಟೀಲ್ ಯತ್ನಾಳ್, ರಮೇಶ್ ಜಾರಕಿಹೊಳಿ, ಪ್ರತಾಪ್ ಸಿಂಹರಂತಹ ನಾಯಕರ ಹೆಸರುಗಳೇ ಇಲ್ಲ. ಇದರ ವಿರುದ್ಧ ಯತ್ನಾಳ್ ಈಗ ಕಿಡಿ ಕಾರಿದ್ದಾರೆ.

ನನಗೆ, ರಮೇಶ್ ಜಾರಕಿಹೊಳಿಯವರಿಗೆ ಬಿವೈ ವಿಜಯೇಂದ್ರ ಸ್ಟಾರ್ ಪ್ರಚಾರಕ ಪಟ್ಟ ನೀಡಬೇಕಾದ ಅವಶ್ಯಕತೆಯಿಲ್ಲ. ನಮ್ಮನ್ನು ಈಗಾಗಲೇ ಕರ್ನಾಟಕದ ಜನ ಒಪ್ಪಿಕೊಂಡಿದ್ದಾರೆ. ನಮಗೆ ಯಾರ ಬಿರುದೂ ಬೇಕಾಗಿಲ್ಲ. ವಿಜಯೇಂದ್ರಗೆ ಅವರ ಅಪ್ಪನ ಕಾಲದಲ್ಲಿ ಹೊಡೆದ ಸಾವಿರಾರು ಕೋಟಿ ರೂ. ದುಡ್ಡಿದೆ. ಅದನ್ನು ಖರ್ಚು ಮಾಡಲು ಪ್ರಚಾರ ಮಾಡ್ತಾರೆ ಎಂದು ಯತ್ನಾಳ್ ಆರೋಪಿಸಿದ್ದಾರೆ.

‘ಈಗೆಲ್ಲಾ ವಿಜಯೇಂದ್ರ ಭಾಷಣ ಕೇಳಲು ಯಾರೂ ಜನ ಸೇರಲ್ಲ. ಕರ್ನಾಟಕ ಬಿಜೆಪಿ ಎಂದು ಎಕ್ಸ್ ಪೇಜ್ ಇದೆಯಲ್ಲ. ಅಲ್ಲಿ ಎಲ್ಲಾ ಟ್ವೀಟ್ ಗಳೂ ಬರೀ ವಿಜಯೇಂದ್ರನನ್ನು ಹೊಗಳಿಯೇ ಬರೋದು. ಅದನ್ನು ಕರ್ನಾಟಕ ಬಿಜೆಪಿ ಎಂದಲ್ಲ, ವಿಜಯೇಂದ್ರ ಬಿಜೆಪಿ ಎಂದು ಹೆಸರು ಬದಲಾಯಿಸಿಕೊಳ್ಳುವುದು ಒಳ್ಳೆಯದು ಎಂದಿದ್ದಾರೆ.

ಇನ್ನು ಉಪಚುನಾವಣೆಯಲ್ಲಿ ಹಿಂದೂಗಳ ವೋಟ್ ಬೇಕು ಅಂತಂದ್ರೆ ನಮ್ಮನ್ನು ಪ್ರಚಾರಕ್ಕೆ ಕರೆಯಲಿ. ಇಲ್ಲಾ.. ನಮಗೆ ಸಾಬ್ರ ವೋಟ್ ಸಾಕು ಅಂತಂದ್ರೆ ಅವರೇ ಪ್ರಚಾರ ಮಾಡ್ಕೊಳ್ಳಿ ಎಂದು ಬಸನಗೌಡ ಪಾಟೀಲ್ ಯತ್ನಾಳ್ ಕಿಡಿ ಕಾರಿದ್ದಾರೆ.