ಒಂದೇ ಕುಟುಂಬದ ಮೂವರು ಮಕ್ಕಳು ನಾಪತ್ತೆ: ದೂರು ದಾಖಲು

ಶಾಲೆಗೆ ಹೋಗಿ ಬರುತ್ತಿದ್ದ ವೇಳೆಯಲ್ಲಿ ಒಂದೇ ಕುಟುಂಬದ ಮೂವರು ಮಕ್ಕಳು ನಾಪತ್ತೆಯಾಗಿರುವ ಘಟನೆ ನಗರದ ಬಾಣಸವಾಡಿ ಠಾಣಾ ವ್ಯಾಪ್ತಿಯಲ್ಲಿ ಕಳೆದ 10 ದಿನಗಳ ಹಿಂದೆ ನಡೆದಿದೆ. 

ಕಳವಾಗಿರುವ ಮಕ್ಕಳನ್ನು ಅಲಿ ಅಬ್ಬಾಸ್(8), ಹುಸ್ನಾ ಬೇಗಂ(6) ಹಾಗೂ ರಹೀಂ ಬೇಗ್ (4) ಎಂದು ಹೇಳಲಾಗಿದ್ದು, ಎಲ್ಲರೂ ಕೂಡ ಒಡಹುಟ್ಟಿದವರಾಗಿದ್ದಾರೆ. ಇವರು ನದೀನಾ ಬೇಗಂ ಎಂಬುವವರ ಮಕ್ಕಳಾಗಿದ್ದಾರೆ. 

ನಗರದ ಕೆ.ಜಿ.ಹಳ್ಳಿ ನಿವಾಸಿಗಳಾಗಿರುವ ಈ ಮೂವರೂ ಕೂಡ ಕಳೆದ ಆಗಸ್ಟ್ 27ರಂದು ನಗರದ ಲಿಂಗರಾಜಪುರಂನ ಸಿದ್ಧಾರ್ಥ ಶಾಲೆಯಿಂದ ಮನೆಗೆ ವಾಪಾಸಾಗುತ್ತಿದ್ದರು. ಈ ವೇಳೆ ಈ ಪ್ರಕರಣ ನಡೆದಿದೆ ಎನ್ನಲಾಗಿದೆ.  

ಇನ್ನು ಮಕ್ಕಳ ತಾಯಿ ಪೊಲೀಸರಲ್ಲಿ ಕೆಲ ಮಾಹಿತಿಗಳನ್ನು ನೀಡಿದ್ದು, ತಮ್ಮ ಸಂಬಂಧಿಕರೇ ಮಕ್ಕಳನ್ನು ಅಪಹರಿಸಿದ್ದಾರೆ ಎಂಬ ಶಂಕೆಯನ್ನು ವ್ಯಕ್ತಪಡಿಸಿದ್ದಾರೆ ಎಂಬುದಾಗಿ ಪೊಲೀಸರು ತಿಳಿಸಿದ್ದಾರೆ. 

ಈ ಸಂಬಂಧ ಬಾಣಸವಾಡಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.