ಬೆಂಗಳೂರಿನ ವಿಲ್ಸನ್ ಗಾರ್ಡನ್‌ನಲ್ಲಿರುವ ಸರಕಾರಿ ಬಾಲಮಂದಿರದಿಂದ 18 ಬಾಲಕರು ಪರಾರಿಯಾದ ಘಟನೆ ಕಳೆದ ಶನಿವಾರ ಮಧ್ಯರಾತ್ರಿ ನಡೆದಿದೆ.
ಪರಾರಿಯಾದ ಬಾಲಕರು ನೆರೆಯ ನೇಪಾಳ ದೇಶ ಮತ್ತು ಓರಿಸ್ಸಾ, ರಾಜಸ್ಥಾನ ರಾಜ್ಯಗಳಿಗೆ ಸೇರಿದವರೆಂದು ಹೇಳಲಾಗುತ್ತಿದ್ದು, ಕಳೆದ ರಾತ್ರಿ ಸುಮಾರು 12. 30ರಿಂದ 1.30 ರೊಳಗೆ ಈ ಘಟನೆ ನಡೆದಿದೆ ಎಂದು ಶಂಕಿಸಲಾಗಿದೆ.
ಪೂರ್ವ ಯೋಜನೆ ಮಾಡಿದ ಬಾಲಕರು ಮಧ್ಯರಾತ್ರಿ ಟೆರೆಸ್ ಮೇಲೇರಿ ನೀರಿನ ಟ್ಯಾಂಕ್‌ಗೆ ಅಳವಡಿಸಲಾಗಿದ್ದ ಪೈಪ್ ಮೂಲಕ ಕೆಳಗಿಳಿದು ಹೋಗಿದ್ದಾರೆ ಎಂಬುದಕ್ಕೆ ಕುರುಹುಗಳು ಲಭ್ಯವಾಗಿವೆ.
ಬಾಲಮಂದಿರದಲ್ಲಿ 4 ವರ್ಷದಿಂದ 18 ವರ್ಷದೊಳಗಿನ ಒಟ್ಟು 255 ಹುಡುಗರಿದ್ದು, ಅವರಲ್ಲಿ 18 ಜನ ಪರಾರಿಯಾಗಿದ್ದಾರೆ ಎಂದು ಮಂದಿರದ ಮೇಲ್ವಿಚಾರಕರು ತಿಳಿಸಿದ್ದಾರೆ. ಪರಾರಿಯಾದ ಬಾಲಕರಲ್ಲಿ ಯಾರು ಕೂಡ ಇಲ್ಲಿಯವರೆಗೆ ಪತ್ತೆಯಾಗಿಲ್ಲ.