ಪ್ರಕಾಶಂ: ಆಂಧ್ರಪ್ರದೇಶದ ಪ್ರಕಾಶಂ ಜಿಲ್ಲೆಯ ತಂಬಾಕು ಬೆಳೆಗಾರನಿಗೆ 2.34 ಕೋಟಿ ರೂ. ವಂಚನೆ ಮಾಡಿದ ಘಟನೆ ನಡೆದಿದೆ. ಅಪರಿಚಿತ ವ್ಯಕ್ತಿಗಳು ವ್ಯಾಪಾರಿಯ ಇ ಮೇಲ್ ಖಾತೆಯನ್ನು ಹ್ಯಾಕ್ ಮಾಡಿ ಹಣವನ್ನು ವಂಚಿಸಿದ್ದಾರೆ. ತಂಬಾಕು ವ್ಯಾಪಾರಿ ಬೆಲ್ಲಂ ಕೋಟಯ್ಯ ಬಲ್ಗೇರಿಯಾದ ಕಂಪನಿಯೊಂದಕ್ಕೆ 2 ಕೋಟಿ 30 ಲಕ್ಷ ರೂ. ತಂಬಾಕನ್ನು ಕಳಿಸಿದ್ದರು. ಈ ಸಂಬಂಧ ಅವರ ಅಕೌಂಟಿಗೆ ಹಣ ಜಮೆಯಾಗಬೇಕಿತ್ತು. ಆದರೆ ವ್ಯಾಪಾರಿಯ ಮ್ಯಾನೇಜರ್ ಈ ಮೇಲ್ ಅಕೌಂಟ್ ಹ್ಯಾಕ್ ಮಾಡಿದ ಬಲ್ಗೇರಿಯಾದ ಹ್ಯಾಕರ್‌ಗಳು ಆಮದುದಾರ ಕಂಪನಿಯ ಜತೆ ಸಂಪರ್ಕಿಸಿ, ಅಮೆರಿಕ ಮತ್ತು ಟರ್ಕಿಯಲ್ಲಿರುವ ಬ್ಯಾಂಕ್ ಖಾತೆಗಳಿಗೆ ಹಣ ಹಾಕಬೇಕೆಂದು ತಿಳಿಸಿದಂತೆ ಕಂಪನಿ ಹಣವನ್ನು ಆ ಖಾತೆಗಳಿಗೆ ಹಾಕಿತು.
ಹಣ ವ್ಯಾಪಾರಿಗೆ ತಲುಪದ ಬಗ್ಗೆ ಬಲ್ಗೇರಿಯಾದ ಕಂಪನಿಯನ್ನು ವಿಚಾರಿಸಿದಾಗ ಈಗಾಗಲೇ ಹಾಕಿದ್ದೇವೆ ಎಂದು ಹೇಳಿದರು .ನಂತರ ಇದು ಬಲ್ಗೇರಿಯಾದ ಹ್ಯಾಕರ್ಸ್ ಕುತಂತ್ರವೆಂದು ತಿಳಿದುಬಂತು. ಸೈಬರ್ ಕ್ರೈಮ್ ಪೊಲೀಸರು ಇದನ್ನು ತನಿಖೆ ನಡೆಸುತ್ತಿದ್ದಾರೆ.