ನಕ್ಕು ಹಗುರಾಗಲು ಐತಲಕ್ಕಡಿ ನೋಡಿ, ಮಜಾ ಮಾಡಿ

MOKSHA

ಹಾಸ್ಯಕ್ಕೆ ಹೇಳಿ ಮಾಡಿಸಿದ ಚಿತ್ರ. ಹಾಸ್ಯಪ್ರಿಯರು, ಮೆಚ್ಚುವವರು ಮಾತ್ರವಲ್ಲ, ವಿರೋಧಿಸುವವರೂ ಒಮ್ಮೆ ನೋಡಬೇಕು. ಅಷ್ಟು ಚೆನ್ನಾಗಿದೆ ಐತಲಕ್ಕಡಿ.

ಸಕುಟುಂಬ ಸಪರಿವಾರ ಸಮೇತರಾಗಿ ಒಂದು ಸಂಜೆ ಹಾಯಾಗಿ ನೋಡಿ ಮನಸ್ಸಿನ ಎಲ್ಲ ದುಗುಡ ಕಳೆದು ನಕ್ಕು ಹಗುರಾಗಲು ಈ ಚಿತ್ರ ನೋಡಲೇಬೇಕು.

ಚಿತ್ರ ಕುಟೀರ ಸಂಸ್ಥೆ ನಿರ್ಮಿಸಿರುವ ಈ ಚಿತ್ರದಲ್ಲಿ 108 ಮಂದಿ ಹಾಸ್ಯ ಕಲಾವಿದರನ್ನು ಸೇರಿಸಿ, ಚಿತ್ರ ಮುಗಿಯುವವರೆಗೂ ನೆನಪಿನಲ್ಲಿ ಉಳಿಯುವಂತೆ ಮಾಡಿಸುವಲ್ಲಿ ಬುಲೆಟ್ ಪ್ರಕಾಶ್ ಯಶಸ್ವಿಯಾಗಿದ್ದಾರೆ. ಇದೊಂದು ಅಪರೂಪದ ಚಿತ್ರವಾಗಿದ್ದು ಎಲ್ಲರಿಗೂ ಹಿಡಿಸುವಂತಿದೆ.

ರಂಗಾಯಣ ರಘು, ಬುಲೆಟ್ ಪ್ರಕಾಶ್ ಅಭಿನಯ ಅತ್ಯುತ್ತಮ. ಇನ್ನು ಕ್ರೇಜಿಸ್ಟಾರ್ ರವಿಚಂದ್ರನ್, ದುನಿಯಾ ವಿಜಯ್, ಸುದೀಪ್, ನವರಸನಾಯಕ ಜಗ್ಗೇಶ್, ವಿಜಯ್ ರಾಘವೇಂದ್ರ ಎಂಬ ಐವರು ಜನಪ್ರಿಯ ನಾಯಕರು ಮುದ್ದಾಗಿ ಬಂದು ಹೋಗುತ್ತಾರೆ. ನಟಿ ನೀತು ಹಾಡು, ಕುಣಿತ ಅಭಿನಯಕ್ಕೆ ಸೈ ಅನ್ನಿಸಿಕೊಳ್ಳುತ್ತಾರೆ.

ಕಲಾವಿದರು ಹಾಗೂ ತಂತ್ರಜ್ಞರ ಪ್ರಯತ್ನದ ಫಲವಾಗಿ ಚಿತ್ರ ಗೆದ್ದಿದೆ ಎನ್ನಬಹುದು. ಸಾದು ಸಂಗೀತ ಸಹ್ಯವಾಗಿದೆ. ಜೆ.ಜೆ. ಕೃಷ್ಣ ಕಥೆ, ಚಿತ್ರಕಥೆಯನ್ನು ಉತ್ತಮವಾಗಿ ರಚಿಸಿದ್ದಾರೆ. ಛಾಯಾಗ್ರಹಣ ಹಾಗೂ ನಿರ್ದೇಶನದ ಹೊಣೆಯನ್ನೂ ಇವರೇ ಹೊತ್ತಿದ್ದು, ಎಲ್ಲಾ ಕಡೆ ಗೆದ್ದಿದ್ದಾರೆ. ಆರ್.ಡಿ. ರವಿ ಸಂಕಲನ ಚೆನ್ನಾಗಿದೆ. ತುಷಾರ್ ರಂಗನಾಥ್ ಸಂಭಾಷಣೆಯೂ ಅಡ್ಡಿ ಇಲ್ಲ. ಉತ್ತಮ ಅಭಿನಯದಿಂದ ಚಿತ್ರ ಗೆದ್ದಿರುವಲ್ಲಿ ಸಂಶಯವಿಲ್ಲ.